再見 ! Sony細電視

Hello !

今日星期日 , 又到出稿日 , 相信呢排都會以無聊瑣碎事為主 .

今次講睡房中的細電視 , 就係呢部喇 .

講開呢部電視 , 都買左好耐咯 , 唔記得有冇在網誌出現過 ?

部機放在睡房裡要黎駁腳 , 睡前睇一睇 , 至到高清廣播出現 , 加過機頂盒 , 

都仲頂得住 , 不過我份人一向都環保 , 唔用到盡都唔會掉 , 

終於等到冇晒反應 , 可以掉喇 , 要諗個辦法解決左佢 .

搬定出黎來個送別儀式 , 辛苦晒 !

Bye Bye !

更換鋅盆漏水位

Hello !

話都冇咁快又到星期日 , 上篇都講過 , 依家拖懶左個身 , 

要好似想當年咁每日出一篇稿 , 睇怕都冇乜可能 .

一周一篇都唔錯丫 , 暫時以呢種方式試下先 , 遲D再作檢討 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次既主題叫做 : 更換鋅盆漏水位 , 即係廚房裡面果個洗碗盆 .

早排發現有漏水情況 , 雖然唔算好嚴重 , 不過果D地方漏水 , 

那怕只係漏一滴出黎 , 都會攪到周身唔舒服 , 非解決不可 .

呢類小工程 , 如果俾人攪 , 連工包料幾舊水 , 相信都冇得點走雞 , 

依稀記得 Maggie & Kaykie 有一篇叫做 : 2013.1.5 更換鋅盤去水位 DIY , 

(唔好意思 , 又要提起你個名)  XD

睇落都唔算太難攪 , 不如膽粗粗試下自己黎 , 慳得一蚊得一蚊嘛 .  ^_^ !!

好多五金舖門口都會擺D材料 , 求其買一包 , 十幾蚊貨仔 .

即係地下果D , 任揀一包 .

買左料就黎囉喎 , 第一件事 , 就係拆開舊既水隔 ,

先先諗住用螺絲批鬆開佢 , 點知已經滑晒牙 , 最後唯有用暴力撬開佢 , 

仲以為好難拆 , 點知條長螺絲經過日子有功 , 變左支牙簽咁 , 一撬就斷開 . 

嚇得我丫 , 如果第一關都攪唔掂 , 仲點玩落去 .

盆底下面既情況 .

舊果個水隔 .

擰開出黎 , 依 ....... 正式係千年污漬 . (有D似芝麻糊)

拆開出黎之後 , 唔駛清潔 , 一陣成套換晒 , 乾手淨腳 .

先介紹下D配件 .

寸半闊 , 標準Size .

拆開就係咁樣 .

喉管有兩條 , 適合唔同Size接口 .

拎走個水隔 , 稍為清潔下 .

下面又係稍為清潔 .

呢堆就係舊料 , 一陣全部掉晒佢 , 實在太過污糟 .

去水口 , 抹到佢乾乾淨淨 .

揀啱所需配件 .

好似砌模型咁砌 .

先由呢件開始 .

記得套個膠圈上去先至好擰 , 否則會漏水 .

就係咁樣 .

正常情況下都唔駛用油灰 , 就咁Cup正就得 .

最後呢度 , 較啱D位就擰緊佢 .

開水測試 , 滴水不漏 , 大功告成 , Yeah !!

慳番幾舊水人工 , 其實呢D正式係人工錢多過材料錢 , 

成包材料都係十幾蚊之嘛 , 好賺到呢 .  >_< !!

Bye Bye !

失蹤咁耐終於蒲頭

Hello !

未開始正題之前 , 先要講三聲唔好意思 , 

因為呢篇網誌與上一篇相隔左足足七個月有多 , 

就連2018年12月尾果場生日會都冇攪到 , 本來可以補攪 , 

不過有前輩話生日會只可以早攪 , 唔可以補攪 , 所以就此作罷 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

咁點解失蹤左咁耐呢 ? 講起黎真係有段故 ......

話說寫完上篇網誌之後 , 隔幾日諗住寫番篇無謂野 , 

點知由果日起開始 , 部電腦冇左反應 , 按下開機掣之後 , 

連續 Do 7聲 , 繼續黑畫面 , 風扇等照郁 , 心諗 :

部機買左兩年多 , 唔係咁快打柴掛 ? 全部配件加埋個正版window 10 , 

足足一萬蚊多DD , 咁就報銷 ? 好慘啫 , 於是乎逐樣Check睇下壞邊樣 , 

最先認為係Ram壞 , 買過兩支新既換落去 , 情況依然 .  >_< !!

跟住拆左塊底板去代理度修理 , 佢Check完話冇事喎 , 仲試埋俾我睇添 , 

佢仲教我睇底板開機時D燈號 , 紅色就有壞 , 綠色就冇事果隻 , 

最後懷疑係CPU壞左 , 於是乎搵下張單睇過有冇保用 ?

張單寫保用3年 , 好彩未過期 , (粒U果陣買都二仟幾蚊)

上到去代理 , 佢話要搵師父Check , 叫我返屋企等消息 , 

如是者兩星期過後 , 收到佢通知 , 話粒U燒左 , 冇藥可救 , 換過粒新U俾我 , 

仲要係免費 . (好 ! 呢D先至係付責任既代理 , 高度讚揚佢既生意手法)

拎左粒新U返屋企重新組裝部電腦 , (未開機之前都有D緊張 , 

因為勝負存亡就響呢度 , 如果唔Work就冇晒佢符) 一開機 ~ 一切正常過正常 , 

當堂 Yeah 左出聲 , 好似D足球員入左波咁既表情 .  ^_^ !!

壞CPU呢樣野 , 相信好多砌機友一世都未遇過 , 真係黑到呢 ...

失而復得 , 真係好開心架 . 

算 ~ 總算攪掂部機 , 咁點解咁耐唔更新呀 ?

都係果D啦 , 拖懶左個身就返唔到轉頭 , 日日都話聽日先啦 .

加上今年農曆年又冇出門 , 更加冇乜心機寫野 , 所以一直磨到依家 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而黎緊呢年 , 即係2020年度既農曆年 , 我都唔保証一定出門 , 

唯有睇住人地D網誌先啦 , Blog友 Maggie & Kaykie

個北海道行程亦都相當之精彩 , 有時間可以頂住癮先 .

好 ~ 呢篇講住咁多先 , 日後會不定期出稿 , 

不過唔會隔幾月個月咁耐先至出一篇既 .

Bye Bye !