2014/12/28

Plan D (升級版)




Hello !


上篇既生日會 , 經已圓滿結束 .

承蒙各界友好於百忙中撥冗蒞臨 , 希望大家明年繼續賞面光臨 , 

實在不勝銘謝 !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

呢篇Plan D 升級版 , 本來想再搜集多D資料先至出街 , 

不過既然講開 , 咁就講埋落去啦 , (星期日總要搵D野黎寫下嘛)  ^_^ !!

由於構思只係在本周裡進行 , 所以只能夠寫個路線圖 , 

詳細景點要慢慢搜尋 , 今次叫得做升級版 , 即係有小許分別 , 

如果未睇過Plan D , 請先去呢度參考下先

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

首先第一日 , 依舊冇行程 , 香港 ~ 成田 ~ 新千歲 ~ 札幌 . (食拉麵)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第二日取車後 , 先參觀 札幌 區內景點 , 有幾個景點我一直想去 , 

不過苦無機會 , 今次一於解決埋佢 , 就係 : 札幌市下水道科學館 , 

呢個係我第一次自駕遊想去既景點 , 可惜去到已經收工 , 今次機會到喇 .

另外係 : 北海道開拓記念館 , 睇過佢網頁 , 要2015年春先至裝修完工 , 

唔緊要 , 仲有時間等佢 , 跟住係 : 大倉山展望台 . 攪掂晒之後 , 

連隨落 苫小牧 , 晚上夜航過 八戶

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第三日就搵番上次Miss既 八戶 景點 , 好似 蕪島 ~ 種差海岸 ...

跟住沿海去番上次 久慈市 , 再落就係之前談及過既 浄土ヶ浜 ,

如果時間許可 , 仲可以去埋 釜石市 . (不過呢度要臨場先決定到)

最後就係入住 浄土ヶ浜パークホテル , (呢間好鬼貴 , 起碼20000Yen一晚)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第四日依舊向中間進發 , 經 盛岡 往 小岩井牧場 , 最後入住 乳頭溫泉

既 大釜温泉 , (其他景點資料仲未搵到 , 慢慢黎啦)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第五日本來想經 秋田 上番 不老不死黃金崎 果頭 , 不過改為去 酒田市 .

酒田市 有D乜 ? 暫時都未搵到 , 淨係知道同 阿信故事 有莫大既關係 ,

其他要慢慢發掘 , 總之今日路程就係經 秋田 沿海邊 落 酒田市 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第六日路線又係好簡單 , 就係由 酒田市 沿海邊落到 新潟市 , 

沿途有乜睇乜 , 對 新潟市 都係好陌生 , 淨係聽過 日職 既 新潟天鵝 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第七日直落 能登半島 , 呢個 能登半島 , 想郁佢好耐架喇 , 今次終於機會到 .

對於我黎講 , 遊覽 能登半島 比參觀 白川鄉 更加有價值 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第八日參觀 能登半島 沿海風景 , 跟住去 友季姐 提供既 千里浜 .

睇過好多短片 , D人鍾意將部車駛入海邊片來片去 , 其實得唔得架 ?

海水黎過喎 ? 車底豈非生晒鏽 ? 即使去到我都只係在沙灘行駛 , 

唔會駛入海裡 , 始終都覺得唔多妥 , 雖然係租車都係咁話 .  >_< !!

參觀完 千里浜 , 跟住就去 近江町市場 , 聽講果度好多 香港人 , 

又睇下係咪真係咁多 ? 攪掂之後就係去 東尋坊 , 睇過Blog友既相片 , 

果度真係堅呀 , 簡直係非去不可 , 晚上去碼頭上船 , 搵到間船公司

有船往 小樽 , 分別有 舞鶴 & 敦賀 都可以上船 , 睇下邊一度就腳再考慮 .

船程由 00:30 --- 20:45 , 足足一整一咁滯 , 都咪話唔長 .

舞鶴 ~~ 小樽航路 , 隻船係咪好正呢 .  ^^


~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第九日呢一整日都在船裡渡過 , 就將隻船當景點啦 , 佢就講到好勁呀 ,

又餐廳 ~ 咖啡館 ~ 視頻室 ~ 按摩椅 ~ 甚至大浴場+桑拿都有 , 

正式係不愁寂寞 , 計我話若然擺幾張百家樂 ~ 廿一點 ~ 骰仔檯既話 , 

更加係不知時日過 , haha ... 落船去到 小樽 , 今次想住 築港果邊 .

搵到間酒店 , 唔包晚餐既話都幾抵住 , 酒店叫做 : グランドパーク小樽 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第十日回到 北海道 呢邊 , 其實都未決定去邊度報仇 , 呢刻暫定上 稚內 .

食完早餐出發往 羽幌町 進發 , 路線就係咁行啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第十一日向 稚內 方向行 , 去番D上次去唔到既地方 , 晚上入住

枝幸温泉ホテルニュー幸 , 呢度之前好似講過 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第十二日一直落到 網走 , 夜晚住 網走湖畔温泉 ホテル網走湖荘 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第十三日都冇乜行程 , 最主要都係返回 札幌 還車 .

夜晚住番套餐果間酒店 , 多數都係 センチュリーロイヤルホテル 

一黎住開有感情 , 二黎近車站 , 三黎個早餐好多款式 , 

最尾果日必定唔同佢客氣 , 食餐勁既佢 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第十四日回港 , 冇行程 !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

整個Plan D 升級版 就係咁喇 , 其實 北海道 呢Part 仲未落實 , 

因為若然咁樣黎行 , 要用多兩日 , 又要同公司火拼一番 ,

睇下點先啦 , 來日方長 , 仲有時間執執佢 .  

Bye Bye !

P.S. : 雖然唔知明年係咪真係用呢個Plan , 不過若然有Blog友覺得唔錯 , 

可以用呢個Plan黎遊覽 , 如果係既話 , 記得通知我一聲 , 

放心 ~ 並唔係收版權費 , 只係想睇到自己既路線可以發揚光大 , 

寫落黎既網誌會同自己所構思既有幾大分別唶 .  XD

2014/12/25

生日快樂2014




Hello !


今日係12月25日 聖誕節 , 

首先祝大家聖誕快樂 & 新年進步 .  ^_^ !!

雖然聽日先至係生日正日 , 不過襯住聖誕節黎個大攪 .

今次係搬遷過黎 Google 第二次攪生日會 , 

歡迎大家賞面光臨 , 小小意思 , 唔成敬意 .

P.S. : 手快有 , 手慢冇 . haha ...


開始喇喂 , 第一件 , 我既 ~ 


之後既自便啦 .  XD


Wow ~ 好快又小咁件 . 


冇晒咯 , 仲有野飲 , 我揀可樂 + VODKA .


而今次既生日願望除左行貨既身體健康 & 搵多D之外 .

當然仲有明年既日本之旅 , 可以順順利利 .

暫時以Plan D 既呼聲最高 , 不過仲有時間可以揀 .

黎緊既時間就係每個Plan 都搵定料 , 好忙既呢 .  ^_^ !!

Bye Bye !

2014/12/21

再談Plan D




Hello !


上回講到既Plan D , 大家都好感興趣 , 本來成數唔係咁高 , 

一下子又同其餘幾個Plan平起平坐 , 至於Plan A 果個行程 , 

由於要9月尾10月頭出門先至放心 , 以我既心急性格加上攞假難 , 

所以都好難可以在該月出發 , 倒不如專注於其他幾個Plan , 

今次主要係再講多次Plan D , 呢個Plan最主題既就係 北海道+青森 . 

(話就話 青森 , 其實包括埋 岩手 ~ 秋田或其他縣)

首先預算 北海道 先玩幾日 , 然後至乘船過 青森 , 咁 北海道 行程如何 ?

真係R到頭爆都未諗到 , 不如講過大海呢Part先 .  ^_^ !!

由 苫小牧 往 八戶 , 船程約莫7個半小時 , 用呢段時間黎渡過漫漫長夜就最好不過 ,

所以23:59呢班船係不二之選 , 唔同時段有唔同既船種 , 

以下呢隻係其中一艘船 , 係咪好有型呢 ? 


去到 八戶 時間係 A,M.7:30 , 即刻就可以展開行程 , 

當然要食埋早餐先啦 . 之前話去 乳頭溫泉 , 冇錯 ~ 果度係要去 , 

不過去之前 , 已經搵到一個好地方 , 就係 : 宮古市 浄土ヶ浜 .

上次最落只係去到 久慈市 參觀 海女基地 , 今次再落多DD去到 宮古市 .

果個 浄土ヶ浜 , 淨係睇宣傳相片已經靚到嘩嘩聲 .

  希望能夠親身一遊 , 睇下靚到乜野程度 .  ^^


在果度住一晚之後 , 先至過隔離 盛岡 , 跟住係 小岩井牧場 , 

最後至輪到 乳頭溫泉 , 暫時講住咁多先 , 遲D再搵到好料先至講 .

Bye Bye !

2014/12/17

Plan D




Hello !


上回本來講到行程Plan D , 不過因夠鐘食飯而暫停 , 

襯今晚攪掂埋佢啦 , 話時話 ~ 呢個Plan D 成行指數較其他為低 , 

之但係開左個頭 , 講就講埋佢啦 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而呢個行程基本上與2013年果個行程大同小異 , 又係 北海道+青森 .

首日照舊 香港 ~ 成田 ~ 新千歲 ~ 札幌 ... 

第二日取車後即往 帶廣 , 果度既豬扒飯聽講勁好味 , 點都要會一會佢 .

之後就去 帶廣動物園 , 最後諗住住番 十勝川 溫泉 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第三日往 釧路 方向行 , 先去 釧路動物園 , 跟住再去 濕原果D展望台 .

夜晚諗住住番上次 幣舞の湯 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第四日得一條路行 , 就係由 釧路 往 襟裳岬 , 沿途見乜睇乜 .

最終去到 風之館 , 晚上入住 うらかわ優駿ビレッジアエル .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第五日向 苫小牧 方向行 , 搵到一間船公司 , 可以由 苫小牧 往 八戶 .

由深夜起航 , 聽朝一早就在 八戶 見 . (又係玩連車帶人一齊過去)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第六日就犀利喇 , 先去個錢湯鬆一鬆 , 之後直往 盛岡 , 

根據Blog 友 Maggie & Kaykie 口供稱 , 盛岡 果頭有個 小岩井牧場 , 

上佢網頁睇過 , 好似唔錯咁喎 .  ^^  跟住落黎仲犀利 , 

就係去 乳頭溫泉 !! (今日唔記得邊張報紙有介紹) 乳頭溫泉喎 ~ 

淨係聽個名都夠香艷啦 , 上次經過 田澤湖 都冇入住 , 今次一於報仇 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第七日經 秋田 沿海邊上番 不老不死黃金崎 果頭 , 

中途經過 男鹿半島 , 記得試佢果個 石燒 , 不過唔知一個人食唔食得晒 ?

本來想入住 不老不死 , 不過佢個單人Plan只係做到3月31日 , 

恐怕都冇辦法幫襯到佢 , 唯有轉戰 深浦町ウェスパ椿山 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第八日經 五所川原 住 弘前城 , 跟住上 八甲田山 , 夜晚翻兜 酸ヶ湯温泉 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第九日行程仲諗緊 , 晚上乘船返回 札幌 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第十日在 札幌 市內觀光 , 晚上住番套餐酒店 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第十一日返回 香港 ...

(如果搵到好料 , 可以加多一日行程在 青森 果邊 , 十二日係極限)

呢個Plan D 由於比較初盤 , 好多野都未整合 , 都係簡簡單單咁介紹 .

暫時都係以 Plan C 呼聲最高 , 之後既時間睇下點啦 .

Bye Bye !

2014/12/14

Plan C & D




Hello ! 


尋晚啱啱同Blog友 友季妹 (應該話 友季姐 至真)  ^_^ !!

講開 Plan C & D , 今日有時間 , 即刻寫番篇 , 唔好怪我多心 , 

所謂一日未結婚 , 都仲有得揀嘛 . haha ... 點解會有 Plan C & D 出現 ?

之唔係睇完 Blog友 Fung Mandy 既 根室一帶既網誌囉 . 果度有霧與冇霧 , 

簡直係兩個世界 , 果D 納沙布岬 ~ 根室車石 ~ 仲有 厚岸 食蠔篇 , 

地方 & 食物都正都冇朋友 , 心諗 : 如果要去既話 , 一擊就要即中 , 

即係話十月左右先至放心 , 之前講過 ~ 果段時間好難攞假 ,  >_< !!

所以不如黎個 移船就磡  , 將果幾日改為北上 稚內 . 

反正 2011年度雪駕遊果次 , 好多景點都因為積雪而封路 , 

另外仲想睇睇冇雪既 稚內 係點樣 , 就當係先攪掂呢度 , 遲下先諗 根室 . 

跟住講解呢幾日度既 Plan C .

第一日老規矩 香港 轉機往 札幌 , 都冇乜行程可言 , 到步食個拉麵就訓覺 .

之後果D講景點呢 , 主於都仲係好初步 , 度掂晒先黎個詳細版 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

攞車之後北上 , 今次唔會直接上 稚內 , 而係由 石狩 開始沿住海邊行 , 

中途有乜岬就睇乜岬 , 最小都有個 雄冬岬 , 再上就係 留萌市 , 

最後在 羽幌町 搵間旅館打躉 , 講開 羽幌町 , 隔離有兩個離島 , 

叫做 天売島 & 焼尻島 , 又係好鬼正 , 不過4至5月都係冇乜野睇 , 

所以唔在行程之列 , 只係參觀下佢個碼頭就算 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟手又係沿海邊北上 , 同上次雪駕遊接軌 , 直上到 稚內 , 

稚內 就有好幾個景點要參觀 , 好似公園與長堤 , 大沼 同埋 宗谷岬 .

宗谷岬 上面果度 , 上次俾冰面跣腳仆街流左第一滴血 , 好彩冇留疤痕 , 

今次一定要去番果度報仇 , 再黎就係北見神威岬 ~ 千疊岩 ~ 三笠山展望閣 , 

呢幾度唔係大雪就係封路 , 又係有仇必報 , 晚上諗住入住 ニュー幸林

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後又係沿海 , 向 網走市 方向進發 , 總之見乜睇乜 , 

好似 天都山 ~ 能取岬 之類 ... (應該仲有其他景點 , 不過仲搵緊)

夜晚唔駛諗 , 一定入住 網走湖莊 旅館 , 唔會有第二間 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

呢日就好簡單 , 淨係往 知床 解決未了心願 , 之前都好似講過 , 

以 五湖 為主題 , 同埋 知床峠 , 講開呢個 知床峠 , 

好幾位 Blog友都係敗去果度 , 希望可以順順利利咁幫大家報仇雪恨 .

晚上又係篤定入住 グランドホテル 北こぶし , 好多Blog友住過都話唔錯 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住就唔去 羅臼 ~ 根室 果頭咯 , 而係去番上次遊覽過既 道東三湖 .

分別係 : 摩周湖 ~ 屈斜路湖 ~ 阿寒湖 , 果度有Blog友返黎冇耐 , 

網誌裡面既景點相當之吸引 , 預算在果度住兩晚 , 旅館方面仲諗緊 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後就係經 濕原 落 釧路 , 入夜既 釧路 正式係屍城 . haha ...

呢樣我都領教過 , 不過想一試 和商市場 既 勝手丼 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟手又去番沿海路行 , 會經過一間叫做 戀問 既 道の駅 , 

後面有個海岸 , 平時都已經好正 , 如果遇著大浪既話 , 

咁就更加正都唔捨得走 . 當日終極景點就係 襟裳岬 既 風之館 , 

希望遇到好天氣 , 影番輯靚相 , 以慰上次失相事件啦 , 

因為上次風和日麗 , D相好正 , 就咁唔見左 , 實在可惜 .  >_< !!

暫時諗住入住呢間叫做 優駿 既溫泉旅館 , 因為上次住過都唔錯 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

玩到呢日都差唔多夠皮 , 呢日既行程主要都係返 札幌 還車 , 

當然都係沿住海邊行 , 有乜好景點都停低影餐飽 , 

返到 札幌 先至係精彩 , 即刻去番上次叫做 :  

天然温泉やすらぎの湯 北のたまゆら桑園 浸餐飽 , 浸完記得幫襯佢食晚餐 , 

正式係抵食夾大件 , 呢類街坊式浸餐飽錢湯 , 我就至鍾意 , 

熱熱鬧鬧咁 , 浸完在休息大廳食晚睇電視 , 感覺一流 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果冇數錯 , 呢日應該係第十一日 , 亦係回港之日 ,

基本上全日都係等機 ~ 轉機 ~ 乘機 , 最後回港 , 次次都係歸心似箭 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

以上11日就係 Plan C 既行程 , 簡單D講即係捨棄 根室 換入 三湖 .

呢個行程冇咁受時間限制 , 唔駛到9-10月 , 大約5-6月都可以出門 .

靈活好多 , 至於 Plan D , 今日都唔夠時間講 , 加上資料都未搜集好 , 

連雛形都未出 , 遲D先至補上啦 .  XD

Bye Bye !

2014/12/07

低處未算低




Hello !


近排經常瀏覽Blog友們既網誌 , 呢度都冇乜點寫 .

今日抽小小時間黎寫番篇 , 否則好易被大家所遺忘 .  ^_^ !!

咁講乜野好呢 ? 就乜野都講D啦 , 首先講剛剛睇有線新聞 , 

話日本廣泛地區落大雪 , 包括 德島縣 ~ 富山縣 等等 ...

(其實果兩個縣位處邊度我都唔知 , 要上Google地圖搜尋先至知)  XD

仲有新千歲機場因大雪而航班取消或延誤 .

所以冬天出門真係好睇天氣 , 是但一度延誤都會牽一髮而動全身 .

除左天氣之外 , 運氣都好重要 , 就好似早幾日 小樽 宏樂園 大爆炸 .

有港人逃生時 , 連証件都黎唔切攞 , 更枉論行李 , 

又冇行李又冇証件 , 都咪話唔大鑊 , 識得日文還好 , 

萬一好似我咁唔識講 , 情況都幾麻煩 .  >_< !!

而今次主題叫做 : 低處未算低 , 係講緊日圓 , 早排 117-118 兌美元 , 

點知事隔冇耐再跌多層 , 變成121美元左右 , 暫時都係觀望階段 , 

如果真係再跌 , 唯有再買D黎溝淡佢 , 真係估佢唔到 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

最後講番明年既行程 , 雖然仲有好多個月先係 , 

若然以呢一刻黎截數 , Plan A 北海道行程比較佔先D .

因為近排睇既網誌 , 主打都係 北海道 , 就講 知床 呢度 , 

原來仲有好多景點未曾一遊 , 包括觀光船 , 而觀光船有兩條航線 , 

長既3個幾鐘 , 短既都個半鐘 , 都算幾長下 .

另外 知床五湖 又係一絕 , 分高架木橋 & 散策路徑 , 如果情況許可 , 

兩邊都想行番趟 , 不過都仲要睇天氣同埋有冇熊出沒 .

跟住就係 カムイワッカ湯の滝 , 呢度又係好正 .

仲有好多架 , 日後仲有大把時間詳談 .

今晚講住咁多先 .  ^^

Bye Bye ! 

2014/12/04

行程Plan B




Hello !


上回講到 Plan A 知床 果頭既復仇之旅優點與缺點 . 

今次輪到講 Plan B , 由於仲係好雛形 , 只能夠略略咁分析行程路線 .

雖然係咁 , 不過連名都幫佢改埋 , 叫做 :和歌山 ~ 鹿 ~ 兔 ~ 貓之旅 , 

係咪好勁呢 ? 睇埋個行程再俾D意見丫 .  ^_^ !!

講番今次靈感來自 Shirley姐 , 之但係 3J家庭 都功不可沒 , 

佢地原來早在2006年已經遊覽 和歌山 , 正式係前輩 , 

尊稱佢做日本旅遊字典都不為過 , 一句講晒 , 勁 !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好喇 ~ 依家講個行程 , 預算為十一日 , 首先去到 大阪關西機場 , 

跟住向 和歌山 方向行 , 又係沿住海邊黎玩 , 途中既景點包括有 :

三段壁 ~ 千畳敷 ~ 円月島 ~ とれとれ市場 ~ 黒潮市場 ... (排名不分先後)

攪掂晒附近呢Part , 繼續沿住海邊行 , 就會見到 串本 呢個地方 , 

當中既 潮岬 , 係 本州最南端 . 如果係呢度常客 , 應該知道我就至鍾意D最乜最物 , 

果D海景零舍正 . 跟住就兜番上去 , 呢度就堅喇 , 叫做 : 太地町 .

D人平時話 海豚 係人類朋友 , 開晒水族館黎訓練 , 表面上 Friend 過打 Band , 

果度一到一月份 , 有個殺豚節目 , 班友在岸邊圍個圈 , 

再上小艇圍插D 海豚 , 攪到整個海邊都係 血染的風采 , 

今程好想去事發地點 , 感覺番當日既氣氛 , 唔好睇日本人客客氣氣咁 , 

佢地都有殘暴既一面 , 可怕 !

攪掂完沿岸再上 , 仲有好多景點等住參觀 , 好似 那智瀑布 ~

徐福公園 ... (由於實在太多 , 加上仍在搵料中 , 所以未能盡錄)

再上就係 三重縣 既 鳥羽 , 呢個時候若然繼續上 , 就係 名古屋 .

不過呢程唔打算去果度 , 所以就轉去 奈良 , 有個叫做 : 東大寺 既地方 ,

睇 Youtube 短片話果度有好多鹿 , 同 知床 D鹿最大分別就係任摸唔嬲 ,

去到又係玩餐飽 , 玩到唔捨得走果隻 .  ^_^ !!

再之後就係行程重點 , 仲記唔記得早排有個兔島 ,

話有位美少女被群兔圍攻拎野食 , 果度叫做 : 大久野島 .

我好想去果度呀 , 不過真係要慢慢搵料 .

再黎呢個直情係重中之重 , 行遠小小到達 愛媛縣 , 有一個貓島 ,

正確名稱叫做 : 青島 , 島上D貓多到數唔晒 ,

我更想去果度呀 . (比去兔島更加想)

所以呢個貓島 , 係呢個行程既主要目標 , 希望搵得到啦 .

再之後都接近尾聲 , 如果有時間 , 仲想參觀 德島漩渦 ,

睇過Blog友既網誌 , 好勁架 .

最後係返回 大阪 再番 香港 , 行程路線係咁上下 .

Bye Bye !



P.S. : 仲未講呢個Plan B 既優點與缺點 , 優點就係四月左右 , 

只要冇雪就可以出門 , 靈活過Plan A 好多 .

缺點就係搵料搵到黐線都似 , 就好似自駕遊定JR遊好呢 ?

JR PASS 係乜野黎 ? 資料完全係零 , 就算自駕遊 , 

全部景點MC都要搵過晒 , 都幾係野 .

就係Plan A & Plan B , 在腦海中不斷遊走 , 今日想呢樣 , 

聽日想果樣 , 真係有排煩 . haha ...

2014/11/30

Blog友們 , 多謝您 ! + Plan A




Hello !


完成了整個行程網誌 , 今日冇得寫 , 反而有D唔慣 ,

充滿失落感 , 不過唔緊要 , 因為仲有其他野寫嘛 , 就係謝票 .

今次既遊記 , 都算係破紀錄 , 有次錄得有12人在線 , 就算減番自己 , 

都有11位Blog友一同觀看 , 在呢度黎計 , 已經相當唔簡單 .

真係要好好咁多謝大家既支持 .  ^_^ !!


另外要多謝既 , 就係Blog友們既好介紹 .

話說寫網誌之餘 , 我都有瀏覽各位既網誌 , 當中 Shirley姐 既網誌 , 

可以話堪稱一絕 , 絕就絕在令我見識到 , 乜野叫做 Hea 玩 , 

簡單D講即係遊覽景點唔多 , 不過就慢慢咁黎欣賞 , 

呢樣同我一貫作風可謂南轅北轍 , 我就乜都要多 , 都幾趕頭趕命  ,

見到原來可以咁玩法 , 對呢種玩法極之嚮往 . 

而佢今次既遊點 , 就係 大阪 ~ 和歌山 ~ 白濱 呢一帶景點 , 為左隆重其事 , 

早日我買左本旅遊天書黎研究 , 皆因我對 大阪 果邊可謂一無所知 .

京阪神達人天書 , 三聯書店購買 , $99.00 冇折扣 . (都幾貴)

平時放午飯閱覽 , 每日睇小小 , 都幾過癮架 , Yeah !!


另外上篇咪話有兩個Plan , 唔知開邊瓣既 ? 今次寫晒兩組行程 , 

等大家參詳一下 , 俾D意見丫 , 我就黎俾呢兩個行程攪到精神分裂咁滯 , 

因為今日鍾意呢個 , 聽日又鍾意果個 , 各有優點及缺點 , 不知如何取捨 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

首先講Plan A , 就係翻兜2012年霧駕遊既景點 , 見到Blog友 : Maggie & Kaykie 

與及 Fung Mandy 既大成功 , 令我又羨慕又妒忌 . haha ...

都想為自己報仇雪恨 , 經過多次行程 , 積落唔小血債 , 報起上黎真係有排報 .

而行程就係 (主要講大方向 , 即係每晚既落腳地 , 細節慢慢再執)

札幌 ~ (幫襯 天然温泉やすらぎの湯 北のたまゆら桑園 係主要任務)

襟裳岬 ~ (風之館 , 一句講晒 , 正 !! )

釧路 ~ (釧路幣舞の湯 , 好想再入住)

霧多布上次間民宿 ~ (厚岸 既 BBQ , 食到唔捨得走咁滯)

 根室 ~ (今次唔試 根室花 , 試試旅館既食宿)

 野付半島 ~ (半邊毛蟹 , 依家都忘記唔到) 

知床 ~ (由 羅臼 經 知床峠 往 知床 , 一直係我未了既心願)

網走 ~ (未結冰既網走湖 , 會係點樣既呢 ? )

旭岳 ~ (姿見の池 , 簡直係鬼斧神工)

留萌市 ~ (考慮緊去唔去埋 ? )

札幌 ~ (套餐另一晚酒店 , 兼還車)

返回香港 ~ (轉機都磨足一日)

Plan A 主要就係呢12日行程 , 期間可能有D修改 , 相信都係小執 .

而呢程既重中之重就係部車 , 記唔記得今次租車本來係想租86 ?

今次如果佢再推出棍波車 , 幾大都租佢 , 絕對不惜工本 .

儘管Blog友 t先生 話棍波係過時產品 , 在學車情意結之下 , 

始終都想試試 , 更加想練成點樣可以在大斜路唔用手掣黎開車 ?

(通常學車時 , 佢會教先踩大油門 , 再鬆極力子 , 直至部車有小許推動之勢 , 

隨即放下手掣 , 再俾D油就行得)

如果有Blog友知道點樣可以唔用手掣在斜路開車 , 敬請不吝賜教 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再講番今次之旅既優點 , 就係絕大部份景點資料都有齊 , 

唔駛再慢慢搵料 , 極之方便 .

而缺點就係月份方面 , 上次4月尾出門撞正大霧 , 5月問過人都係唔得 , 

就算係9月尾10月頭 , 都唔係實食冇黐牙 ? 偶然都會遇到大霧 .

依家係12月頭 , 如果要等到明年10月先出發 , 又好似耐左D , 

心急既我實在好難忍到果日先出發 , 所以不知如何是好 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

依家要去食晚飯 , 和歌山果頭遲D再寫埋佢 .

Bye Bye !

2014/11/28

2014北海道11天自駕遊 後記篇




Hello !


剛剛寫完整個行程 , 橫掂有時間 , 不如寫埋個後記 .

今次既遊記都算堅喇 , 由6月頭寫到11月尾 , 幾近6個月咁滯 , 

雖然唔係日日寫 , 不過出勤率都好高架 . 

打後既日子都可以休息一下 . 咁又唔駛驚冇野做咁寂寞喎 , 

因為有好幾位Blog友既遊記要煲 , 所以有排都唔得閒至真 .

當中以 Maggie & Kaykie 同埋 Fung Mandy 兩位既遊記 , 

值得高度關注 , 因為好有可能成為我下一次旅遊既目標 .

還記得2012年果次霧駕遊嘛 ? 果次大霧到呢 , 正式係唔好提 .

而且果次既尾段 , D相又係失落左 , 所謂新仇舊恨 , 希望能夠一鋪清 .

另外我又有一個新行程構思緊 , 果度係邊度 , 下篇先至詳談 .

所以下年唔係開呢瓣就係開果瓣 , 兩個地方都在研究中 .

咦 ~ 好似同後記有D離題 , 不過算啦 , 就搵呢D黎當後記啦 .

OK ~ 又要去煲網誌 , 星期日再見 .

Bye Bye !








2014北海道11天自駕遊D11-6 大結局篇




Hello !


上回講到在 新千歲機場 搭機落 成田 , 話咁快就到步 .

今次要轉接駁巴士往大堂 .


Wow ~ 好多部 ANA 航機 .


反正去到都有排等 , 一於做最後落車果個 .


搵番轉乘通道 , 再經過一輪出境手續與及手提行李檢查 , 

一出到黎就係呢度 , 試過好幾次 , 熟晒架部咯 .


TOY BOX , 見唔見左手邊既高達 ?


經過咁多年 , 依家屹立不倒 .  ^_^ !!


果陣才不過係 P.M.4:00 , 仲有兩粒鐘要磨 .


唯有四圍行下啦 .


KAGURA


HARAJUKU


Miranda kerr


Tokyo Food Bar , 唔食住 , 等上機先 .


差唔多時候 , 埋定位先 .


等了又等之後 , 終於入閘 .


飛到某個高度 , 可以鬆綁 .


飛機餐到 ...


中午淨係食左個便當 , 呢餐梗係要清晒佢啦 . 


有入自然有出 , 人之常情 . haha ...


記得洗手 .


睇套電影再恰番陣 , 好快就落機 , 過埋海關等候領取行李 .


拎埋件行李即刻搭機鐵 , 歸心似箭 .


11日行程就此結束 , 多謝收睇 .

Bye Bye !

2014/11/27

2014北海道11天自駕遊D11-5 還車篇




Hello !


上回講到參觀完 千歲三文魚館 , 黎到呢度 , 

已經拖無可拖 , 玩埋今 ~ 明兩晚就正式結束整個行程 , 

不過臨尾都要整兩單驚嚇野過我歎 , 正式係臨天光先黎瀨 ...

好彩只屬輕微性質 , 只要淡定就有錢剩 .  ^_^ !!

話說攪掂晒 三文魚館 時 , 時間剩番好小 , 可能係行錯路果度影響啦 .

仲有入滿油呢Part未攪 , 於是乎搵個最就手既油站黎攪埋佢 .

去到果個油站 , 係就係有職員 , 不過駛入去都冇乜反應 , 

平時果D仆倒咁黎招呼架嘛 , Why ? 原來呢個係自助入油站 , 

本來慢慢摸索既話 , 或者都可以攪掂 , 只不過呢刻時間唔容許咁做 . 

於是乎叫佢過黎 , 再扮到一面茫然咁既表情 , 佢都忍唔住幫拖 , 

每一個流程都講解 , 我都冇郁過手 (除左入錢之外) , 基本上都係佢一手包辦 ,

不枉我次次入油都幫襯 ENEOS 油站 , 大恩不言謝 , 第日飲茶我既 .

( 仲有 ~ 自助入油果度寫住 セルフ , 記住咯喎 !! )

攪掂第一個驚嚇 , 輪到下一個 , 就係一進入機場範圍 , 車裡面突然發出

D0 ~ Do ~ Do 聲響 , 心諗 : 攪咩野呀 ? 唔通唔記得關上油蓋 ?

又唔係丫 , 唯有唔理佢繼續行 , 不過心理上有所影響 , 

部車楂到衰衰咁 , 可能騎住中間線黎行 , 好彩當時附近冇乜車 , 

直到依家 ~ 我都唔知點解部車會發出呢D聲響 ? 

另外機場地方都頗大 , 分叉路又多 , D路牌經常出現IC標誌 , 

一個唔覺意入錯線 , 恐怕未必有上次咁好彩 , 都幾得人驚架 .  =_= !!

好彩 ~ 經過重重波折之後 , 終於都 Toyota 在望 .


新千歳空港すずらん店 , 前面轉右丫 , 唔該 .


轉埋個灣 , 就泊在小巴前面啦 .


今次還車比較仔細 , 個職員繞場一周黎檢查 , 

平時租 Axio , 還車時佢望都唔望多眼 .


幸好僅僅趕及在限期時間前還車 , 真係一額汗 . 

雖然過DD鐘未必駛補錢 , 不過做臭個朵就唔係幾好啦 , 

仲有機會再幫襯嘛 .  ^^


等佢計埋 ETC 數 , 找妥晒之後 , 拎齊所有收據 . 

佢俾張A4過膠紙我 , 上接駁車時交俾司機 , 佢就識得做野 .


上接駁車 , 行李放前面 .


比想像中長既車程 , 到達機場大堂 .


Bye Bye 喇 , 接駁巴士 .  ^^


入去咯 .


在機場還車轉黎呢度 , 都係第一次 , 平時多數搭JR或機場巴士 .


落成田 , 當然係國內線啦 .


新千歲機場 , 唔駛多介紹 , 大家熟過我啦 .


係咁咦影幾張當交差 .


最後一擊 , 有買襯手 .


木雕手工藝品都有 , 真係旅遊景點都唔駛去 .


邊行邊搵國內線 , 順便買個便當 .


Check in & 行李寄艙可以省略 , 一黎就到候機室 .


ANA 係佢喇 .


襯仲有時間 , 拎定個便當出黎 .


等唔切上機時食 , 依家就要解決佢 .


呢位姐姐有D面善 , 有D似當年號稱最強外勞果位 Leah Dizon


磨多兩磨 , 夠鐘上機 .


唔駛搭接駁巴士 , 就咁入閘 , 好丫 .


一齊上 .


今次坐機頭部份 , 訓一陣先 ...


聽晚攪掂埋個最後一擊大結局 .

Bye Bye !