2012/11/29

2012北海道10天霧地自駕遊(修訂版)D7-5完(親子岩&優駿AERU篇)




Hello !


上回講到參觀完 "襟裳岬" , 呢篇繼續 .

攪掂晒之後 , 打算往酒店 Check in , 輸入GPS 

預算到達時間係 P.M.6:30  , 當時係 P.M.5:15左右 , 

講到呢度又要叉開一陣 , 聽聽心路歷程 .

~~~~~~~~~~~~~~~~~~~~~~~~~~~~~~~~~~~~~~~

話說出發前搵料果陣 , 本來想住呢度附近既旅館 ,

當時在 "樂天" 度搵 , 真係有房喎 , 誰不知真正訂果時 , 

間間都話冇房 , 焗住要搵間遠小小既酒店 ,

從Google 地圖度睇 , 距離呢度一吋都唔夠 , 諗住都近近地 , 

點知都要成個幾鐘 , 真係估佢唔到 , 唯有出老規矩 , 

用快車黎壓縮時間啦 , 出到某個路口時 , 有一輛私家車剛到訂 , 

點都要讓佢行先 , 果陣諗住 : 哎吔 ! 阻住晒個地球轉 , 

好 ! 跟住你尾先 , 再搵機會扒你頭 .

(雖然係跟住尾 , 不過都有十個八個車位 , 唔會真係啄人尾咁冇品既)

誰料佢段段快放 , 每轉一個灣都俾佢將距離拉遠 , 高手呀 !

我都算勁架啦 , 都只能目送佢遠去 , 

照咁睇佢好有可能係 "地元の人" , 唔係點會咁利害 .

~~~~~~~~~~~~~~~~~~~~~~~~~~~~~~~~~~~~~~~~~~~~~

終於在力戰之下 , 爭取到六點前到達酒店之餘  ,

仲有時間去多個沿途景點參觀 .

(我最唔鍾意遲到 , Book左 18:00 到達)

呢度叫做 : 親子岩 .


係咪好似兩公婆拖住個細路呢 .  ^^


攪掂上到直去酒店 , 又係填表果D手續 , 

再講埋晚餐 & 聽朝早餐時間 , 咁就可以上房 .

由於D相冇晒 , 只能夠影佢D宣傳單章交差 .


呢度叫做 "優駿 AERU" , 

如果夏天黎既話 , 仲有騎馬等活動 .


個溫泉仲好正添 .


D房樓底好高 , 我住果間仲有張 "按摩椅" 任你坐 , 

浸完溫泉再按一按 , 爽呀 !


不過埋單仲爽 , 一泊二食 10550Yen .


食完晚餐休息陣再浸溫泉 , 之後坐一坐按摩椅再休息 .

Bye Bye !

第七日完 .

2012/11/27

2012北海道10天霧地自駕遊(修訂版)D7-4襟裳岬篇




Hello !


上回講到在 "黃金道路" 招牌影相 , 呢篇繼續 .

去到果度都差唔多到達最尾既景點 "襟裳岬" .

下圖都仲係 "黃金道路" , 不過D草咁綠 , 唔知佢邊個月份影既呢 ? 

再重申 , 藍框D相係從網上Copy , 並非原創 .

我自己影D相俾我錯手刪除 , 講起又一次心痛 .  >_< !!


往 "襟裳岬" 中途見到一個叫做 "百人浜" 既地方 ,

如果冇估錯 , 果度應該係一個露營地點 , 

所以都冇停留 , 影張地標相就走得 .


終於到達呢個期待以久既 "襟裳岬" .

果度地方比想像中大 , 仲好靚添 , 如果未黎過既 Blog友 , 

而又對呢類海邊 "岬" 有興趣既話 , 

我強烈推介呢個地方 . Yeah !


呢度絕不下於 "積丹半島" 個 "神威岬" , 

唯一係輸蝕左個 "蠟燭台" , 之但係呢度可以落到最底部 , 

  咁又贏番唔小分數 .  ^_^ !! 

即係最遠處亂石堆 , 千祈咪走雞呀 !


黎多張添 , D水咁藍既 ? 唔通執相 ?


下面兩張紅框既相 , 係我影既 .

係該處叫做 "風之館" , 入場費大人300Yen .


個館係講解果度既資料 , 同埋提供望遠鏡 , 

好彩既話可以睇到亂石堆裡面 , 有 "海豹" 嚮度曬太陽 .

果日就有十零廿隻歎緊日光浴 , 不過只能夠遠觀 ,

冇得影相 , 除非D器材勁專業 .


Bye Bye !

2012/11/25

2012北海道10天霧地自駕遊(修訂版)D7-3黃金道路篇




Hello !


上回講到在 "昆布刈石展望台" 度睇海景 , 呢篇繼續 .

攪掂晒後往下一站 , 其實除固定景點之外 , 沿住海路黎行 ,

好多無名海岸線都係好鬼靚 , 有D就爛石灘 , 有D就大浪灣 , 

雖然唔出名 , 不過都好靚架 , 呢程車真係過足癮 .

就好似呢一類既石灘 , 仲有埋停車影相位添 .


呢張好似係上篇剩落既 "昆布刈石展望台" , 

不過同級數既海岸線都為數不小 .


真係靚到殺死人 .  ^^


途中經過一個叫做十勝港既地方 , 有個停車場 ,

有幾隻海鷗嚮度 , 無無聊聊之下 , 拎埋殘餘既餅乾出黎餵海鷗 ,

好好玩架 , 如是者又玩左半粒鐘咁滯 , 繼續開車 .

好快就去到 フンベの滝 .


呢度屬於 "日高山脈" 地段 .


雖然唔算好壯觀 , 不過都OK掂 .


中間果座係 "海難供養碑" , 呢度一定發生過慘劇 , 唉 ...


之後繼續呢行 , 見到一個寫住 "黃金道路" 既石碑 , 

所謂 : 男兒膝下有黃金 , 估唔到連道路都有黃金 , 勁 !


Bye Bye !

2012/11/23

2012北海道10天霧地自駕遊(修訂版)D7-2昆布刈石展望台篇




Hello !


上回講到在 "戀問館" 參觀 , 呢篇繼續 .

"戀問海岸" 個海灘好大浪 , 好靚架 , 影夠相之後上車往下一站 .

~~~~~~~~~~~~~~~~~~~~~~~~~~~~~~~~~~~~

未講下一個目的地之前 , 有D野襯住記得講左先 , 

今日既行程裡面 , 唔記得邊一段路 , 在行山路途中 , 

有段大約十分鐘車程 , 攪到我想爆粗咁滯 , 點解呢 ?

話說當時冇落雨 , 不過就地濕濕 , 本來就好小事 , 不過地下有D窿 , 

三幾步就一排大窿 , 行一陣就要收慢部車 .

由於D窿裝滿泥水 , 所以唔知邊個深 , 邊個淺 ?

揀錯深既窿轆過去 , 部車就震一震 , 

段路簡直係為測試部車防震功能而設定 , 咁既路 , 真係扯火 .

記得果陣在部車裡大叫話 : 乜 "日本" 政府好窮咩 ?

鋪番條路都冇錢 , 唔係呀嘛 !!

好彩條路唔係太長 , 十分鐘左右就出番大路 , 

倘若全日都係呢D咁既路 , 真係邊度都唔駛去 , 好彩 .

~~~~~~~~~~~~~~~~~~~~~~~~~~~~~~~~~~~~~~~~~ 

好 ~ 攪掂心路歷程 , 講番下一站 , 就係 "昆布刈石展望台" . 

又係一個一望無際既海岸線 , 唔同既係呢度居高臨下 ,

(雖然係同一個地方 , 但係張相就靚過我去果陣好多)


因為我去果陣D草冇咁綠 , 

而且仲有小量霧氣 , 冇呢張咁Sharp .


既然居高臨下 , 當然係在上山啦 .


攪掂個展望台 , 下一站就係 "長節湖" .


呢度同之前 "根室" 附近果個唔同架 , 唯一相同之處 , 

就係一樣咁冷清 , 影一陣相之後就上車 , 

沿住 "襟裳岬" 方向南下 .

Bye Bye !

P.S. : 由於搵相困難 , 所以只係搵到小小咋 .  =_= !!

2012/11/21

2012北海道10天霧地自駕遊(修訂版)D7-1戀問海岸篇




Hello !


上回講到食完拉麵返酒店 , 呢篇繼續 .

在地下大堂一陣網 , 攪掂就上房睇陣電視 , 

然後去浸溫泉 , 之後就休息 .

一覺醒來到達第七日既開始 , 今日行程好簡單 , 一條路行晒 , 

即係由 "釧路市" 直踩落 "襟裳岬" 果度 .

中途見到邊度靚就影邊度 , 不過睇地圖 , 條路都幾長 , 

所以每度都唔可以停留太耐 , 依家食左早餐先 .

下圖間房既形式 , 正係我住果間房 , 叫做 "和式" .


起初我Book房果陣 , 冇預在酒店食早餐 . 

諗住幫襯 "和商市場" 勝手丼 , 不過俾大霧影響左雅興 .

所以Check in 時職員問我會否在酒店度食早餐 ?

我問 : 幾多錢先 ?

佢答 : 俾多1500Yen 就OK .

我話 : 好 ~ 殺你 ! (費時出街食)

就係咁 ~ 梳洗過後落樓下食早餐 , 記得當日都幾多人 , 

所以唔係影左好多相 , 不過呢度既早餐 , 又真係唔錯喎 .

應該有既野都有 , 連唔應該有既野都有 , 正 .


食完上房執野 , 攪掂就 Check out , 下圖就係分析圖 .

依家在 "釧路" 呢邊 , 終點係 "襟裳岬" , 之前講過 , 

離開 "釧路" 範圍慢慢就冇晒D霧 , 果陣天清氣朗 , 藍天白雲 , 

影左好多靚相 , (咁樣先黎遺失相片 , 真係天意弄人 , 好話唔好聽 , 

假設下次真係去番呢度 , 都唔敢保証有呢種天氣)

再講番呢個 "襟裳岬" , 同 "稚內" 一南一北 , 雖然唔夠 "函館" 咁南 ,

之但係都好正架 , 如果有Blog友考慮緊去唔去呢度 ,

我推介幾大都要去番趟 , 不過落雪天時就唔知點環境咯 .


第一站係呢個 "戀問館" , 

所謂 : 戀問館 , 其實係一個賣海鮮既地方 .


就在 "道の駅" しらぬか 裡面 .


隔離有D雪糕小食賣 .


呢個 "道の駅" , 仲有一樣出名 , 就係炭燒豬扒飯 , 

人氣 No.1 架 , 可惜我剛食完早餐冇耐 , 所以無緣一試 .


無緣一試既 , 仲有呢款雪糕 , 因為4月28日先開售 , 

我去果日係4月27日 , 再一次可惜 ...


呢度都好多野食喎 , 意粉 , 正 .


仲有特產手信 . Yeah !


不過最正既 , 都要數到呢個海岸 , 只要兜去佢後面 , 

就可以見到呢個 "戀問海岸" , 一條長長既海岸線 ,

風高浪急 , D海浪聲好好聽架 , 謀殺左我唔小記憶咭位置 .


當時大風又大浪 , 好有氣勢 .


依家諗番都覺得好正 .


Bye Bye !

2012/11/19

2012北海道10天霧地自駕遊(修訂版)D6-16完(釧路市內觀光篇)




Hello !


上回講到到達酒店 "幣舞之湯" , 呢篇繼續 .

放低行李之後 , 落樓下黎個 "釧路" 市內觀光 .

第一個目的地 , 正係樓下既 "幣舞橋" , 橋上面有四個像 , 

分別代表 : 春 ~ 夏 ~ 秋 ~ 冬  

詳細既典故我就唔知 , 淨係知道幾有特色 .

呢度就係 "幣舞橋" , 好多Blog友都嚮度影過相 .


左邊兩個像 , 右邊又係兩個像 , 地下有隧道互通 .


春 ~ 夏 ~ 秋 ~ 冬 , 不過唔知排位正唔正確 ?


呢度就係酒店房望落黎果間 釧路フィッシャーマンズワーフ MOO

出面露天部份 , 5月中左右會有燒烤攤檔 , 風味十足 .

我去果陣係四月尾 , 所以未攪掂 , 仲嚮度搭緊帳蓬 .


而右手邊果座 , 即係上篇話好似 "番鹼" 果舊 , 

其實係一個植物園 , 叫做 : EGG .


D植物好靚 , 果度同 MOO互通 , 當日行完 EGG後 ,

穿過通道往 MOO , 而 MOO係一個類似 "大食代" 既地方 , 

分別由好多食店組成 , 不過我去果日係4月26日 , 

唔知乜野節日 , 好多檔都休息 , 所以晚餐並非幫襯果度 .


參觀完 MOO & EGG之後 , 向 "釧路駅" 方向行 ,

沿途見到 ANA 酒店 . (就在 MOO後面)


行左好耐 , 終於去到 "釧路駅" .


車站門口有好多 "古靈精怪" 野 , 而且附近好多酒店 , 

夠晒方便 . (仲有租車公司添)


"和商市場" 就在佢斜對面 , 不過晨早收晒工咯 .


之後四圍參觀及影相 , 直至晚餐時間 ,

其實當時都唔知食乜好 , 行左好多間都唔合心水 ,

最後決定食拉麵 , 就在車站附近 , 入去叫個叉燒拉麵 , 

再加餃子 & 啤酒 , 可能佢見我D "日文" 講到衰衰咁 , 

於是問我邊度黎 ? 我話係 "香港" , 由於當時冇乜客 , 

所以同佢地車天車地乜野都講一番 , "日本" 有度好 , 

就算你D "日文" 點差法 , 只要話自己係 "下手" , 

佢地一定會答 : 唔係丫 , "上手" 至真 , (其實有幾多料自己知) 

不過俾佢講一講 , 登時增加左唔小信心 , 覺得自己都幾勁喎 .  ^^

拉麵 , 參考圖片 .


食完之後天都黑齊 , 係時候返酒店 , 由車站行番酒店 , 

條大街寫住 1000m , 都唔算太遠 , 不過入夜之後溫度大跌 , 

越行就越凍 , 越凍就越行 , 幾經艱辛先捱到番酒店 .

而呢間 "幣舞之湯" 酒店 , 除了溫泉 & 早餐正之外 , 有樣不得不提 , 

就係樓下兩部俾住客用既電腦 , 係 lenovo 唔知 i3 定 i5 既大 Mon 電腦 , 

(即使係 i3 CPU 已經正過我屋企部腦)

上網好快好爽 , 都好落本喎 , 唔似得 "根室" 酒店部腦 , 又殘又舊 ,

我懷疑佢仲係用緊 56K黎上網 , 正式係等你等到我心痛 .

 雖然部腦係好正 , 不過點都唔夠溫泉吸引 , 

Check 好網誌及瀏覽完其他野之後 , 就返房準備一陣去浸餐飽 , 

呀 ~ 仲有 , 樓下大堂好似有野飲 , 無料架 . 

不過當時經已飲飽啤酒 , 所以冇乜為意 .

之後浸完溫泉再睇多陣電視 , 梳洗一番就休息 .

Bye Bye !

第六日完 .