2018/02/28

2018四國9天自駕遊 ~ 序




Hello !


2018年度既四國自駕遊 , 已於星期日深夜返回香港 , 圓滿結束 .

話就話圓滿 , 其實都係麻麻地 , 安排上面有D失當咁話啦 .

首先係返到香港已經係夜深 , 機鐵都收晒工 , 焗住要搭的士 ,

返到屋企要成$300.00車費左右 , 都幾貴架 .  =_= !!

另外仲想講 , 一上到高速公路 , 司機開到成120km , 自己揸果陣唔多覺 , 

到做乘客先至發現 , 原來120km都幾激架 , 個心都離一離 .

(今次自駕遊都試過踩到120km , 不過只係點到即止)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住既安排失當係路程 , 四國呢度雖然唔夠北海道大 , 

不過9日要繞場一周都有D壓力 , 畢竟都包含四個縣在內 ,

而我份人一向眼闊肚窄 , mark低好多景點 , 都玩唔到幾多個 , 

好多景點都要慢慢參觀 , 並唔係落車影兩張相就鬆人 , 所以時間又用多左 , 

一日D時間鬼死咁快過 , 食完早餐開車玩兩玩就到黃昏 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講完安排失當就輪到講安排恰當 , 今次租呢部 N-Box .


只係撞手神揀佢 , 點知呢類車仔在四國可謂大派用場 , 皆因有D山路 , 

單線雙程行車之餘 , 仲窄到嚇死人 , 另一邊又冇欄杆 , 若然照以往租大車 , 

就算行得到都冇呢類車咁靈活 , 而且在街上經常都會見到呢類車種 , 

証明當地人都覺得佢夠實用 , 車身窄兼車身高 , 正係佢賣點 , 正 !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後既安排恰當係上網sim咭 , 出發前在鴨記買左張咭8日任用4G , 

(其實只係賊佬試沙煲 , 唔知用唔用到 , 諗住呃晒都係$90.00)

點知效果出奇地好 , 絕大部份地方都可以隨意上網 , 爽呀 !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住就講天氣 , 今程有兩日落雨 , 分別係第二日及最尾果日 .

最尾果日就冇乜所謂 , 第二果日影響都幾大 , 好多重頭景都在果日 , 

俾佢攪一攪 , 都咪話唔掃興 , 第三日即刻買番把遮 , 點知就風和日麗兼曬爆 , 

正午果陣著短袖T恤都嫌熱 , 早同晚都陰陰凍 , 都算帶夠衫啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好喇 ~ 序呢章就講到呢度 , 正式旅遊網誌要多等幾日 , 

剛返到黎屋企 , 房裡百廢待興 , 全部野都未歸位 , 包括心情 .

俾多幾日時間啦 , 大家要預左呢輯網誌係大長劇咁睇 .

Bye Bye !



2018/02/15

2018出發暫別篇




Hello !


聽日就係大年初一 , 首先預祝大家 萬事勝意 , 大吉大利 , 

花開富貴 , 學業進步 , 最重要當然係身體健康 , 同埋搵多D啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

而聽日亦都係出發既大好日子 , 聽朝一起身就有排忙 , 

相信都冇乜時間寫到網誌 , 所以呢篇就叫做 預先出發篇 .

講開又講 , 睇番以前既旅遊網誌 , 唔計2008年東京果次 , 

原來今次係首次離開北海道 , 單係一個地區咁黎遊覽 .

聽人講四國D路好難行 , 唔知難成點呢 ? 真係有D緊張 .

睇番D天氣預報 , 今次四國四個縣都行晒 , 係24號果日有雨 , 

其他日子都OK , 叫做收貨咯 , 希望佢D天文台唔好攪錯啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好啦 ~ 講到呢度都差唔多 , 如果時間許可 , 

去到果度都會寫番篇直擊報導 .

Bye Bye !

2018/02/12

閉關完畢 , 準備出發




Hello !


唔覺唔覺 , 今日已經係年廿七 , 經過多日黎既閉關 , 

行程已經大功告成 , 總算鬆一口氣 .   ^_^ !!

相信咁多次既旅遊 , 今次係最遲度掂行程既一次 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

雖然講過好多次 , 不過都要講 , 今次行程 , 以海景為主 ,

東南西北四個岬係必到景點 , 之後係靈場 , 四國八十八個靈場 , 

當然唔會去得晒啦 , 求其揀幾個順路既參觀 , 

跟住係動物園 ~ 水族館之類 , 另外 今治 果頭 , 有條跨海大橋 , 

如果有興趣 , 可以租部單車踩過去 , 不過我諗唔會租咯 , 

都係旨在參觀 , 影下條跨海大橋算啦 , 最後係 德島漩渦 , 

果度係重頭戲 , 可以話係非去不可 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

行程就講住咁多先啦 , 仲有好多豐富景點 , 未能盡錄 .

放心 ~ 返到黎必定如數奉上 .

仲有幾日就出發喇 , 心情相當之緊張 .

Bye Bye !