2013/12/30

冬天出門唔多盞(延續篇)




Hello !


呢篇係早幾篇 "冬天出門唔多盞" 既延續篇 .

內容係話 "日本" 既暴雪 , 有增冇減 .


報導話新年假期前幾日 , "日本" 北部受到強烈冷空氣影響 , 

持續強風暴雪 , 多個機場航班唔係停飛就係延誤 , 截至昨日 , 

"北海道" 札幌市錄得積雪達130厘米 , 落小小既 "青森縣" 溫泉區 ,

積雪更高達180厘米 , 日本天文台方面表示 , 暴風雪會持續到元旦日 .

正如上篇所講 , 冬天出門實在太多野難以預計 , 

遇著航班延誤已經夠慘 , 大吉利是若然去到先遇到暴風雪被困 , 

糧水及衣物不足既話 , 隨時瀨大鑊都有份 , 所以真係要考慮清楚先 .

聖誕及除夕都係旅遊旺季 , 如果暴風雪持續 , 都咪話唔掃興 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~ 

好喇 ~ 天氣報告就講住咁多 , 講開日本料 , 黎多一單 .

早幾日 "日本" 首相 "安倍晉三" 不理全民反對參拜

供奉有二次大戰甲級戰犯既 "靖國神社" .

今日報紙話有人想發起 "罷買日貨" , 我個人認為唔駛喇掛 ,

所謂禍不及家人 , 正如當年 "菲律賓" 總統衰格唶 , 冇理由搵菲傭黎出氣 .

所以我照食 "菲律賓" 出產既生果 , 頂多就唔去 "菲律賓" 旅遊 .

(其實係冇乜興趣去果度)  XD

講開罷買日貨 , 依家就比較容易 , 以前D人既家電 , 

十居其九都係日貨 , 家陣有 Samsung 同埋 LG , 形勢黎個大逆轉 ,

隨便在街搵人抽樣調查 , 睇下佢用邊個牌子既手機 ,

相信 Samsung 會多過 Sony 好多個百份點 .

至於罷去 "日本" , 更加係冇可能 , 正如D麻甩佬 , 

相信佢地都唔肯罷睇日本 AV 而轉睇鬼婆 AV 掛 . haha ...

Bye Bye !

2013/12/27

Yahoo Blog一路好走(悼念篇)




Hello !


尋日12月26日發生左兩件事 , 

第一件係生日 , 生日會經已結束 . 第二件係 Yahoo Blog 正式關門大吉 .

生日會上篇開完 , 呢篇主要講 Yahoo Blog 關門事件 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

由8月尾佢宣佈結束後 , 至今已經四個月 ,

期間經歷過封Blog , 攪到旅遊網誌要開另一個戶口 . 

完成晒整個旅遊網誌後 , 即使佢變成唯讀 , 我都會上去瀏覽 , 

依家佢正式關門大吉 , 心情上若有所失 .畢竟第一次寫網誌 , 就係由 YB 開始 . 

最後果日我上番自己兩個網誌度記錄番D資料 . 

A區 (即係首個網誌) , 有 915657 個瀏覽次數 .

B區 (即係新開網誌) , 有 131239 個瀏覽次數 .

扣除番自己瀏覽次數 , 都有成接近 100萬次點擊 , 

對於我黎講 , 都算唔簡單咯 , 嚮度多謝曾經上過黎參觀既讀者 , 多謝晒 !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

話說呢個網誌既由來 , 係當年年少氣盛既我 , 

在報章裡見到乜野唔順眼 , 都拎黎講一餐 , 尤其係自殺攪攪震果D , 

更加係剷到佢上天花板 , 之後乜野都講下 , 好似 : 足球 , 

私人恩怨之類 , 最後見人地寫旅遊網誌寫得咁過癮 , 

自己都加入戰圈 , 結果一寫就寫到依家 .

呢6年裡面都同 YB 經歷過好多篇網誌 , 依家佢正式結束 , 

就拎番部份曾經上載過既相片黎懷緬一番 . (相片排名不分先後)

首先第一張 , 風球過後黎過直擊報導 .


呢隻碟在遊日期間購買 , 明明唔識日文都買隻日文版 , 

都幾無謂 .  XD


最初版本既資料統計 , 累積瀏覽 133073 , 勁 ! 


有8個人同時在線 , 多謝支持 !


CHOYA 梅酒 , 好正架 .


地圖URL 係搵 Mapcode 既方法 .


曾幾何時 , 有好多垃圾留言 , 黑名單多達 302 人 .


棕熊大鬧 "斜里" , 之後去實地考察一番 .  ^^


鴨記電煲 , 一套一舊水 . Yeah !


班門弄斧學人講足球 , 紅魔下盤穩 .  ^_^ !!


新聞時事亦佔左好多篇網誌 .


過年湯丸 , 私人恩怨篇經常出現 . 


仲有好多張相可以懷緬 , 不過篇幅所限 , 不能盡錄 .

懷緬住咁多先啦 .  

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~ 

P.S. : 至於當日 Yahoo 提供既另一個網誌 : with GOtrip .

經過詳細考慮 , 決定唔參加咯 , 理由只有一個 .

就係 : 棄我去者 , 昨日之人 , 不可留 !

2013/12/26

生日快樂2013




Hello !


今日係12月26日 Boxing Day , 

亦係我既生日正日 , 而今次亦係搬遷黎 Google Blogger

第一次生日 , 所以嚮度攪番個簡單而隆重既生日會 .

首先黎蛋糕一個 . Yeah !


再黎蛋糕幾件 .


唔夠喉既話 , 再黎多幾件 . 


生日願望當然都係果幾味 , 不外乎係身體健康 , 

發個新年財 , 去多幾趟 "日本" 咁啦 , 

其實最重要都係開開心心 , 事事如意就OK .

好 ~ 可以開餐 , 小小意思 , 唔成敬意 , 食大佢啦 .

Bye Bye !

~~~~~~~~~~~~~~~~~~~~~~~~~~~~~~~~~~~~~~~~~~~~~~

P.S. : 頭先上 Yahoo Blog 果度睇下點 , 

上到去已經關門大吉 , 唯有祝佢一路好走啦 .  ^_^ !!

2013/12/23

冬天出門唔多盞




Hello !


剛剛心血來潮 , 不如寫番篇網誌 .

頭先上Blog友 "小肥兄" 網誌度參觀 , 佢有一篇叫做 "問你怕未" ?

內容係講 "北海道" 新千歲機場 , 因大雪有多班航機欠航 .

雖然依家既日元跌左唔小 , (早日 "頭條日報" 都有報導)

不過冬天出門真係要考慮清楚 , 皆因D雪大到得人驚 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

如果去旅遊時遇著大雪 , 來回程又航班欠航 , 

相信呢個假期都幾 "刻骨銘心" , 唔講唔知 , 其實我都有一刻諗過 , 

不如二月尾黎番個 "北海道" 雪地之旅 , 不過好快就打消 .

因為好耐之前都列出過幾味冬天出門既弊處 , 依家不妨再講多次 .

首先係日短夜長 , 每日俾佢扣兩粒鐘 , 十日既話 , 足足扣咁一日行程 .

之後係安全問題 , 如果技術好既話 , 應該都冇乜難度 , 

係就係驚遇到盲頭烏蠅唶 , 至於我 ~ 暫時都未走出陰霾 .

另外係封路問題 , 好多地方都會因為大雪封路 , 

我都有好幾個景點望門輕嘆 .  >_< !!

好喇 ~ 唔好處就講到呢度 , 咁當然雪地出門都有佢既好處啦 , 

如果唔係都唔會有咁多人出門 , 落雪浸溫泉 , 點都正宗過

大暑天時浸嘛 .  ^^

呢刻維持原判 , 5月中球季結束先至出門 , 係咁先 !!

Bye Bye !

2013/12/16

離職啟示




Hello !


本人 man wai , 於 2013年12月16日

正式離開 Yahoo Blog , 今後 Yahoo Blog 一切華洋轇轕 , 

皆與本人無關 , 特此聲明 . 

~~~~~~~~~~~~~~~~~~~~~~~~~~~~~~~~~~~~~~~~~~~~~

其實10日之後 , Yahoo Blog 都會正式結業 , 

呢篇啟示只係想帶出一個訊息 , 就係搬Blog一事 , 經已圓滿結束 .

回想起呢幾個月既搬Blog事件 , 可謂苦樂參半 , 

感覺上好似3個幾月去6次 "日本" , 叫做溫故知新 .  ^_^ !!

至於苦既係佔用晒我收工休息既時間 , 由於有成接近600篇網誌 , 

每晚只能搬幾篇 , 連星期日都要趕貨 , 電視都係聽多過睇 , 

依家攪掂晒 , 可以正式咁睇電視喇 . Yeah !

~~~~~~~~~~~~~~~~~~~~~~~~~~~~~~~~~~~~~~~~~~~~~~~

咁點解唔用匯入網誌 ? 之前唔記得有冇講過 , 

曾經去成功匯入網誌既Blog友度參觀 , 發現頗多甩漏 , 

就好似D相片大細邊或爆格 , 回應又冇左Blog友相片 , 

總之就效果唔多理想咁啦 , 與其匯入完都要每篇執漏 , 

倒不如重新上載 , 雖然係手續繁複 , 但係出黎效果滿意 , 

縱然係捨易取難 , 總算每篇都好好睇睇 .  ^^ 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

至於今後有乜計劃 , 暫時諗住休息一排 , 

去下Blog友們既網誌度參觀 , 就好似 : (排名不分先後)

コーさん , t , Nerissa , 3J家庭 , 小肥 , 編號 , Shirley , 1733兄 , 

CK鼠 , 路過蜻蜓 , Nono's Blog , PIGGYBREAD , cowcow ...

(下刪500人 , 編幅所限 , 未能盡錄 , 如有掛漏 , 請諒 ! )

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外旅遊方面 , 呢刻初步諗住明年5月中球季完結後出門 , 

地點係 "北海道" 既 富良野 , 美瑛 , 層雲峽等地為主打 , 

如果有剩時間 , 或者執多一兩個地方 .

只可惜公司假期只係二月至五月可以動身 , 

暫時都未敢諗去 "根室" 果頭報 (上次大霧瀨大鑊) 既仇 .

不過距離依家仲有成五個多月 , 慢慢度都未遲 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~

好喇 , 講住咁多先 , 繼續睇 TVB 頒獎典禮 . 

Bye Bye !

2013/12/05

Yahoo 重生記




Hello !  


頭先試試再上Yahoo Blog , 咦 ~ 攪番掂喎 .

又可以繼續執網誌 , 今日在公司仲諗 , 假設Yahoo真係提早執笠 , 

咁應該點呢 ? 尋晚雖然更新左兩篇 , 不過同重新寫冇乜分別 , 

極之耗損資源 , 即係浪費時間 , 既然佢攪番掂 , 

一陣又執番幾篇啦 , 咁依家做乜 ? 

當然係睇番尋晚果場 "新特蘭vs車仔" , 3:4客其他 , 

實在太勁 , 唔睇保証終生後悔 . haha ...

好 ~ 夠鐘 , 埋位睇波 . 

Bye Bye ! 

2013/12/04

Yahoo提早執笠 ?




Hello !  


攪乜鬼 ? Yahoo玩提早執笠呀 ?

頭先諗住入去搵番D網誌 , 結果點都入唔到 , 

明明話12月26日結束架 , 點解會咁 , 出爾反爾 , 好卑鄙唶 .

我之所以咁慶 , 係因為我要對番D舊網誌 , 

先至可以搬到去呢度既網誌 , 依家入唔到去 , 攪到我進退失據 .

話時話 ~ 搬網誌進度比預期中順利 , 已經攪掂大部份 .

剩番最後一個旅遊網誌 , 即係 "北海道 + 青森" 呢Part ,

只要攪掂埋就大功告成 , 依家俾Yahoo攪一攪 ,

唔通要出Plan B ?

Bye Bye ! 

2013/11/27

再見 . 秋葉原




Hello !  


今日頭條 : 秋葉原無線電街Sayonara .


呢單報紙料係尋日 "太陽報" 刊登 , 

內容話經營了64年既 "秋葉原" 電器街 (電子零件市場攤檔) ,

因受網上購物頂爛市影響 , 決定於本月底結業 . 

講開 "秋葉原" , 對上果次參觀係2008年東京自由行 , 

(由於剛搬完網誌 , 所以記憶猶新)

當日有幸瀏覽佢既 "電子零件攤檔" , 由於在 "鴨寮街"附近工作 , 

所以參觀完都未有感到特別震撼 , 反而出面街一幢幢既大型家電中心 , 

睇到我嘩嘩聲 , 果D新款家庭電器 , 正式係唔打得都睇得 .  ^_^ !!

記得當日參觀完 "秋葉原" 家電中心 , 再去附近食拉麵 + 餃子 , 

味道一流 , 到依家仲回味緊 . haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~

不過有樣野令我感到奇怪 , 若然係網購頂爛市既話 , 

理應係大型家電商店首當其衝 , 簡單D講即係就算執笠都佢執先 , 

有乜理由電子零件攤檔執先 ? 話晒租金點都小過大型公司掛 ?

~~~~~~~~~~~~~~~~~~~~~~~~~~~~~~~~~~~~~~~~~~~~~~~

至於網購 , 相信都好難做到我生意 , 皆因我份人一向多疑 , 

買野既話 , 最好就一手交一手 , 即使係 Yahoo 果D所謂拍賣 , 

(在地鐵交收果隻) 我都絕對唔會幫襯 , 唔知點講 , 

總之就好似冇乜保障咁啦 . 

Bye Bye ! 

2013/11/22

阿信的故事




Hello !


尋晚同Blog友 t 講開 "阿信屋" , 

話果度有 "摩周湖の水" 賣 , 於是今晚收工去走番一趟 ,

去到凍櫃搵搵 , 唔見喎 ? 可能唔係間間分店都有啦 , 

不過入寶山又豈能空手回呢 ? 於是乎求其執番兩件 , 

就係 "芥辣豆" 同埋右手邊果包唔知乜 .  ^_^ !!

另外仲送多一張10蚊戲票折扣券 , 用黎睇電影 "阿信的故事" ,

可謂夠晒傳神 , 一齊唱番Part歌啦 , 準備 :

命運是對手 , 永不低頭 , 從來沒抱怨半句 , 不去問理由 , 

 仍踏著前路走青春走到白頭 , 成功只有靠一雙手 , 奮鬥 ...


講開日本零食 , 還記得以前要經過好多渠道先至買得到 .  

所謂 : 一個酸梅兩個核 , 今時就唔同往日 . ^^

依家要買既話 , 真係話都冇咁易 , 一落樓下就攪掂 . 

不過話時話 , "阿信屋" 開業時以日本零食為主 , 時至今日 , 

已經有好多其他國家既食物銷售 , 包括 : 韓國及台灣等 ...

而我主要都係幫襯佢買日本零食 , 亦因為咁 , 

即使去到 "北海道" , 都買小好多食品 , 

反正價錢又唔相差得幾遠 , 無謂拎餐飽嘛 . 

好 ~ 講住咁多先 , 繼續睇 "法外風雲" 結局篇 .

Bye Bye !

2013/11/02

日本櫪木縣名物展




Hello !


早日睇報紙見到有個 "日本櫪木縣名物展" 介紹 .

老老實實 , 對於 "櫪木縣" 所知真係有限 , 淨係聽過 "櫪木SC" . 

(依家在 "日本乙組聯賽" 排名第8 , 聽日將會作客 "長崎成功丸" , 

"馬會足智彩" 暫時賠率係 2.95 , 買些小支持佢都好喎)

至於佢在 "日本" 邊個地方 ? 真係俾張地圖我都指唔出 . 

於是上網搜集佢既資料 , 原來就在 "東京" 上面 "日光" 果頭 .

而呢個名物展就在 "荷里活廣場" 舉行 , 既然近近地 , 

今晚收工一於去探過究竟 , 一去到 ~ 即刻見到連場打鬥 , 

有兩位 "美少女" 與 "忍者" 扮相既男人火拼 , 

間唔中有位老伯出場攪笑 , 期間播放 "金鐵交鳴" 既打鬥音響 ,

呢個情況有D似曾相識 , 就係 "登別伊達時代村" 裡面打鬥模式 , 

不過 "登別" 果度仲要肉緊小小 . 

就在地下舞台打鬥 , 走來走去 .


打鬥中 ... (四圍取景)


有工作人員在攝錄 , 好Pro喎 .  ^^ 


忽然二對一 . (試試唔用閃光燈)


老伯忍者負責攪笑角色 .  ^_^ !! 


睇唔到既話 , 樓上有大電視播放 .


本來隔離仲有D名物介紹 , 同埋旅遊資訊部 , 

不過部相機冇電冇得影 , 唯有拎D資料返屋企慢慢睇 .


睇完之後 , 覺得果度都係一個唔錯既地方 , 

只不過明年即使出門 , 亦多數唔會選擇果度 .

因為我始終都係 "北海道" Fans , 就算離開 "北海道" ,

次選都暫定 "能登半島" 或者 "鬼太郎" 家鄉 "境港市" 果頭 .

依家始終都仲有一段長時間 , 可以慢慢考慮 .

如果大家有時間 , 不妨去 "荷里活廣場" 睇睇佢地 , 

個名物展做埋聽日 (11月3日) 就完結 .

Bye Bye !

P.S. : 櫪木SC 作客不敵 長崎成功丸 , 慘吞兩蛋 .  0:2 

2013/10/19

變形金剛大戰大南街





Hello !  


呢幾日既新聞都圍繞住 "變形金剛" , 等我都黎襯熱鬧 , 整番篇網誌贈慶 .

話說呢套電影黎 "香港" 取景 , 仲要 "深水埗" 都係其中之一 , 

既然黎到我主場 , 點都要過去睇睇 .


係咁咦影兩張相啦 , 真係掛滿燈籠架 .



黎張遠小小既 , 不過佢地未開工 , 聽日應該會好熱鬧 .  ^^

一去到首先見到就係招牌兩旁掛滿紅色燈籠 , 可能在外國人眼中 , 

咁樣先至夠 "中國" 氣氛掛 ? 另外咪錶位旁擺滿雪糕筒 , (應該係用黎趕車) 

其餘都冇乜點改動 , 聽D街坊傳聞 , 聽日(星期日)將會封街拍攝 , 

屆時希望各商戶繼續開門 , 黎營造平日既氣氛 , 電影公司會有小小心意 , 

大約數仟圓左右既報酬 . (不過呢D都係聽番黎 , 未經証實)

好彩唔係在我果邊攪咋 , 因為大好星期日都要返公司 , 

真係會好唔高興 , 有錢收都係咁話 , 不過人地貴為億萬金元大製作 , 

仲要全世界發行 , 度度都可以取景 , 偏偏就千里迢迢黎到 "香港" ,

仲要係 "深水埗" , 若然企硬唔開門 , 又似乎有點不近人情 , 所以都幾難抉擇架 .

依家咪好囉 , 在另一邊拍攝 , 唔駛煩到我 , 到電影上畫時又可以睇番呢幕 , 

相信都只會係3幾分鐘劇情既唶 , 唔好有乜大期望 .

最後講番收 "陀地" 果幾條 "躪癱" , 呢D人渣正式係唔死都冇用 , 

攪到 "香港" 個朵臭晒 , 報導話佢地係 "黑社會" 既會員 , 

究竟今次收陀地行動 , 係自發性定抑或係奉 "社團" 既名義 , 

我覺得該 "社團" 有必要出黎澄清 , 甚至開除佢地 "黑社會" 會籍 , 

邊有人咁黐線架 ? 收果10萬蚊陀地 , 人地返去唱衰 "香港" 既話 , 

"香港" 損失何止10倍 , D人真係低能到爆 , 

再簡單D講 , 簡直係垃圾之中既垃圾 , 案件都唔駛點審理 , 

求其拖出去亂棍打死再五馬分屍 . 

Bye Bye !

2013/08/23

2013北海道&青森12天自駕遊(修訂版)D13完工總結篇




Hello !

上回講到攪掂晒整個行程 , 

頓然覺得有種 "如釋重負" 既感覺 , 呢個行程由5月21日正式開始 , 

至到寫到10月7日 , 為期足足4個半月 , 本來唔止架 , 

不過就住Yahoo Blog死線前攪掂 , 所以加快進度 .

~~~~~~~~~~~~~~~~~~~~~~~~~~~~~~~~~~~~~~~~~

講起今次網誌 , 原先以為上次失相事件已經夠遺憾 , 

點知今次既遺憾就更大 , 點大法 ? 大到要開多一個網誌黎繼續 , 

今鋪都算係失策 , 一日都係自己衰多手按下 "輕鬆搬家" .

攪到即時封Blog , 最慘就係D備份根本完全幫我唔到 ,

不過算啦 , Yahoo Blog呢度始終都會一筆Out消 , 

到時一切恩怨亦都會煙消雲散 .

~~~~~~~~~~~~~~~~~~~~~~~~~~~~~~~~~~~~~~~~~~~

講番打後既去向 , 我諗住搬往 Google Blogger (已經搬齊)

不過暫時都係測試階段 , 等到試用期屆滿後再決定點環境 .

另外再講 Yahoo Blog 執笠一事 , 好多Blog友都轉投 Google Blogger ,

亦有Blog友放棄 , 當中以 "電占與豆豆" 最為轟烈 ,

佢既網誌人氣遠勝於我 , 都可以話唔寫就唔寫 , 

淨係呢份能捨既胸襟 , 我都望塵莫及 , 佩服 !

~~~~~~~~~~~~~~~~~~~~~~~~~~~~~~~~~~~~~~~~~~~~~~

至於我咯喎 , 他日即使真係在 Blogger 掛單 , 

都係邊寫邊休 , 即係3 ~ 5 ~ 7日先更新一次咁啦 .

畢竟都寫左咁耐 , 好難話放棄就放棄 , 

但係又唔想太操勞 , 唯有採取 "中庸之道" 啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~ 

最後 , 能夠在 Yahoo Blog 12月26日結束之前 , 

搬晒所以旅遊網誌過黎 , 心情都幾暢快 , 

好似剛完成一個大Project , 舒服晒 !!

Bye Bye !

2013/08/22

2013北海道&青森12天自駕遊(修訂版)D12-4完(回到香港篇)




Hello !


上回講到在 "新千歲機場" , 呢篇繼續 .

hea到夠鐘就上機 , 開到咁上下 , 拎盒便當出黎 .

我一拎個便當出黎 , 服務員就即刻拎杯茶俾我 , 

都唔駛我出聲 , 呢D咪專業囉 , 讚呀 !

OK ~ 開餐 ...


個零鐘後抵達 "成田機場" , 轉乘接駁巴士中 ... 


到著後即上櫃檯辦理正式出國手續 .


完成後出番另一邊 , 整理番好D証件先 .


其實 "成田" 呢度都黎過好幾次 .
  

伊藤園嘛 , 見慣見熟啦 , 睇番舊網誌 , 

原來 2011 & 2012年度旅行都係經 "成田" 回港 , 

加埋今次 , 即係連續3次經佢 .


呢度都好多野賣架 , 雖然唔夠 "新千歲" 咁旺場 .


詢問處 .


"高達" 依然健在 , 未俾 "古渣" 打殘咩 ? haha ...


再一次行舖頭 , 今次都要入番些小貨啦 .


整番幾盒餅睇門口 .  ^^


首先係 "抹茶の大福" .


東京士多啤梨味大福 .


東京香蕉味蛋糕 .


買完野搵個地方安頓好行李 , 順便上一陣網 .


自從有手機 & 板腦等產品 , 

呢D100Yen10分鐘上網機 , 完全冇人幫襯 , 

相信唔捱得幾耐就要收皮 .  =_= !!


話咁快就上機 , 仲開埋添 , 又到飛機餐時間 . 

set A 還是 set B 好呢 ?


揀得黎都到左 , 開餐啦 , 上篇淨係食個便當 , 

隔左幾粒鐘 , 不知幾咁肚餓 , 邊個話飛機餐唔好食架 ?


都不知幾正 , 如果大家想試好食既飛機餐 , 

我建議起飛前幾粒鐘千祈唔好食野 .

好多人Check in 後即刻去 "翠華" 或者 "大家樂" 同 "麥記" 開餐 ,

咁攪法 , 飛機餐梗係食之無味啦 , 一於用我呢個方法黎試下 , 

保証對 "飛機餐" 要重新估計呀 .


食完個餐睇多場電影 , 過一陣就到步 , 辦好入境手續 , 

去行李帶認領番件行李 , 搭機鐵出市區 .


下一站係 "青衣" , 去到再轉的士直接到樓下 .


返到屋企 , 呢兩支係用剩餘既硬幣買既 , 午後之檸檬茶 , 正 !


大結局 , 整個行程完畢 , 多謝支持 , 後會有期 !

Bye Bye !

第十二日完 .

2013/08/21

2013北海道&青森12天自駕遊(修訂版)D12-3新千歲機場篇




Hello !


上回講到搭巴士往機場 , 呢篇繼續 .

拎齊行李就行得 , 入口有張案內圖 , 

幫襯過呢個 "新千歲機場" 咁多次 , 唔駛案內咯 .


自動樓梯 , 上去啦 , 咪住 .


D行李都幾重 , 都係搭電梯好D .


到黎 , 好多野賣呀 .


呢個機場大家都好熟 , 基本上都無需多介紹 , 

求其影幾張相交差算數 .  ^^


國際線 & 國內線 , 轉機落 "成田" , 當然係行 "國內線" .


經常排隊排到開巷既 "花畑牧場" .


siretoco sky sweets , 應該係賣 "冬甩" .


白之戀人餅 , 入晒貨啦 .  ^_^ !! 


基本上整個機場都可以搵到黎買 .


LAWSON 便利店 .


拎住件行李 , 始終都冇睇得咁過癮 , 搵個櫃檯 Check in .


記得揀番国際線乘り継ぎ , 不過攪錯佢都會通知你 .


攪掂晒D手續 , 得番件手提行李 , 返去再火拼過 .

 "長腳蟹" 等濕貨都有 , 如果直航既話 , 可以考慮 .


有D似大舊既 "糯米糍" .


海產乾貨 . (先前在 "小樽" 買左兩包 "帶子乾" )


かま栄 ? 乜野黎既呢 ? 唔記得過去睇添 .


飲品售賣機 . (請打橫睇)


玩玩下都夠鐘 Stand by , 14:10 成田


就算係閘口附近都有店舖 , 真係想打劫我個銀包 . haha ...


其實只係睇多過買 , 係咁咦買幾包麵睇門口 ,

"利尻昆布" , 食完當去過 .


買個便當 , 一陣上機食 . (內陸機淨係包飲品)


上一陣網 , 好快就夠鐘上機 .


內陸機冇乜人 , 可以好悠閒咁上機都得 .


呢張好有 "衝上雲霄2" Feel .  ^_^ !!


Bye Bye !