2012北海道10天霧地自駕遊(修訂版)D2-11完(知床通宵車篇)

Hello !

上回講到離開 "黃金岬" & "寶島" , 呢篇繼續 .

當時時間話早唔早 , 話晏又唔算太晏 , 不過之前唔知有冇講過 ,

今次行程以 "知床" 對落為主打 , (當時未知勁大霧 .  >_< !! )

所以放棄 "島武意海岸" 及 "神威岬" 呢兩個景點 ,

之後開車往下一個目的地 , 就係 "知床" , 呢篇主要想講心路歷程 . 

(而且通宵駕駛 , 精神要高度集中 , 所以沿途都冇乜點影相) 

由 "積丹半島" 美國港 (即係 "水中展望船" 碼頭) 

行車往 "知床" (總站係 "道の駅" うとろ・シリエトク ) 

根據Google地圖報料 , 全長486km , 就算行埋 IC , 

需時都要9小時零40分鐘 , 比起上次由 "札幌" 往 "稚內" 374km ,

仲要多足100km , 認真唔簡單呀 , 不過呢一程車 , 我都期待了好耐 .

自從第一次自駕遊未開始 , 心裡面已經有呢個構思 , 

橫掂都租左部車 , 點解唔車盡其用呢 ?

只不過當時係首次自駕遊 , 個牌又雪藏了行久 , 

對各方面都唔係好熟習 , 所以唔敢謬然一試 .

直至第二次自駕遊 , 由於係冬天落雪 , 更加唔想嘗試 .

等了兩年 , 今次終於機會到 , 我個人認為 : "北海道" 通宵自駕遊 ,

一生人起碼都要試一次 , 真係好爽架 .

雖然唔係完全冇車 , 不過好大段路程都係四野無車 , 

即使有 , 絕大部份都好似去攞出世紙咁 , 一經俾佢地扒頭 , 

點樣努力都跟唔到佢車尾 , 簡直就係 "頭文字D" .  ^_^ !!

而期間仲發現一個大秘密 , 就係 "道東" 果頭既有鹿跳出黎既路牌 ,

一直都以為佢嚇鬼 , 原來真正目的 , 係俾夜晚駕駛者睇 .

因為入夜之後 , 真係有動物橫過馬路 , 一個唔小心撞鬼死佢就唔係咁好啦 .

仲有 , 深夜駕駛果陣 , 係有必要開高燈 , 

因為高燈既燈光反射落遠處D螢光棍果度 , 真係望遠好多 , 

雖然高速公路有街燈 , 不過完全冇燈既地方都唔小 , 

條路黑媽媽淨係靠車頭燈睇路果種緊張刺激法 , 

絕對非筆墨所能形容 , 所以呢程通宵車 , 

係今次失敗之旅既其中一樣成功 ,叫做加番D分咁啦 . 

好喇 , 都講左咁耐 , 係時候介紹僅有既相片 .

呢張係高速公路中途休息站度影既 , 深夜果陣 , 

休息站店舖關門 , 淨係開洗手間與自動售賣機 , 

好彩我一早已經入定貨 , 以備不時之需 .

另外駕駛夜車時最忌瞌眼訓 , 唔係誇張 , 之後過幾日 , 

"日本" 當地就有呢類新聞 , 仲好似死左幾個 , 都幾嚴重 . 

所以我非常之留心 , 稍為覺得唔妥都停埋一邊 .

唔記得行了幾耐咯 , 淨係知右手邊係 "網走駅" . 

(深夜經過呢度 , 真係冇乜幾可)

前面左手邊應該係 "網床破冰船" 上船果個 "道之駅" .

(駕駛中影相 , 係咁上下 . haha ... )

凌晨3點鐘 , 終於到達預算停低既 "道の駅" . (即係 うとろ・シリエトク )

有幾粒鐘可以瞌番陣 , 聽日再搏殺過 .

雖然好過癮 , 不過真係幾疲倦 , 玩通宵車呢味野 , 

最好預計埋充足既體能 .

咁大個 "道の駅" , 只係得兩部車停泊 , 仲有一樣值得一提 ,

就係梳洗過後 , 本來諗住開小小窗瞌到天光 , 

點知果度深夜刮起大風沙 , D沙吹落部車度都啪啪聲 ,

如果打開窗 , 部車肯定唔駛要 , 

所以索性關埋車窗鎖好門大覺訓 , 好彩都唔算太焗 .

係咁先 , 要瞌埋果幾粒鐘 .

Bye Bye !

第二日完 .