Hello !
上回講到餵完海鷗之後去食晚餐 , 呢篇繼續 .
飽餐一頓後返上房稍事休息 , 打開窗已經夜晚 ,
黑媽媽見唔到海鷗咯 , 只有海浪聲及間唔中既海鷗呱呱聲 .
而呢個時候 , 亦係搵節目既時間 , 原先諗住取車去 "函館駅" 果頭行 ,
知就知D舖頭收晒工 , 諗住淨係影相 , 點知落到酒店大堂 ,
見到人頭湧湧 , 乜野事呢 ? 細問之下 ,
原來佢地有 "函館山" 本地團 , 1800Yen包旅遊巴來回及纜車費用 .
(其實出發前都聽過有呢味野 , 不過諗住自己去 , 所以冇乜點上心)
依家見到熱熱鬧鬧咁幾過癮 , 況且參加本地團同成班日本人一齊都未試過 ,
心郁郁又想加入戰圈 , 就係咁 , 即刻報團加入 , 所謂報團 , 只係俾錢賣票 .
上車之後俾個團章我 , 回程果陣要黎確認身份 ,
唔好唔見呀 , 不過就算自己搭車番酒店 , 都唔係太貴 .
好有跟團 Feel 呀 , 有導遊沿途講解 , 不過唔識聽唶 . =_= !!
由溫泉酒店往 "函館山" 纜車站 , 好快就到 .
係咁咦排一陣隊就有纜車到 .
上到山後 , 佢講埋個集合時間就解散 , 爭取時間 ,
今日首要既任務就係 : 影相 !
只可惜我功力未到家 , 買部 G10咁耐 , 都係半桶水唔夠 .
擺得上黎既 , 叫做比較滿意 .
呢張掂呀 , 我鍾意 !
其他果D真係嚇死人 . ^^
好唔掂呀 . haha ...
可能係星期日既夜晚 , 山上勁多人 , (當晚係2010年5月9日)
好唔容易先搵到個位影相 .
不愧為三大夜景之一 , 好好風景呀 !
最後一擊 , 影完去行紀念品部 .
行完紀念品部之後 , 到達佢約定時間 , 夠鐘集合 ,
其間又發生一段插曲 , 話說當日部車都幾多人 , 我心諗 : 咁多人 ,
死唔信個個都咁守時 , 總會有一個半個遲到既 , 爭在遲多遲小 ,
而我既風格一向係唔會做最早果個 , 亦唔會係最遲果位 ,
跟住在集合點上一層既紀念品部行到剛夠鐘先落去 .
(如果行得快 , 唔駛十秒就到集合點)
所以個鐘搭到正一正果陣 , 即刻去集合 , 誰料到所有人已經到齊 ,
有冇攪錯 ! 竟然個個都咁守時 , 冇可能既 .
終於做左一次最遲果位 , 不過嚴格黎講 , 我冇遲到喎 ,
係佢地全部早到 , 雖然佢地都冇乜野講 ,
但係個個都望住晒 , 好似好樣衰咁 . =_= !!
之後開車返酒店就解散 , 咁多位 Bye Bye !
返到酒店房 , 又係介紹間房既時間 .
洗手間 , 連埋浴缸 . (有溫泉既話 , 浴缸變得可有可無)
馬筒仲係噴水果隻 . (都幾難搵到唔係噴水)
食完晚餐返黎果陣 , 已經鋪好張床 .
四個方位影都影齊 .
果晚都冇乜點睇過電視 ,
不過聽晚就做 "月九" Chiling 果套 "月之戀人" .
間房點呀 , OK嘛 ?
沖番杯綠茶飲 .
頭先就係呢個窗口餵海鷗 .
聽聽海浪聲 , 好正架 . (不過打開窗都幾凍)
仲有雪櫃一個 .
湯之浜酒店915號房 , 好一間令人難忘既房間 .
攪掂後就去浸溫泉 , 浸完好好舒服架 .
順便講埋 , 一泊二食 , 連入湯稅 , 每晚8550Yen .
(今次在呢度住兩晚)
Bye Bye !
第三日完 .
沒有留言:
發佈留言
歡迎光臨 , 如果時間許可 , 請留番個言丫 ~