2012北海道10天霧地自駕遊(修訂版)遊後檢討篇

Hello !

大家好 ! "2012北海道10天霧地自駕遊" 網誌 ,

上篇經已大結局 , 雖然中間經歷過悲壯既 "刪相事件" ,

不過大家依然不離不棄 , 嚮度要講聲多謝支持 !

而今次呢篇 , 黎番個遊後檢討 , 回顧今次既行程 , 有邊一段比較難忘 .

首先講今次自駕既重點 , 今次租部Toyota Axio 8日7夜 .

租金 53602Yen , 全程入油 19531Yen , 高速公路費 6200Yen ,

泊車費 2010Yen , 加埋都幾貴架 , 如果多D人攤分就平D ,

可惜我份人一向獨行慣 , 好難搵到適合人選 .

~~~~~~~~~~~~~~~~~~~~~~~~~~~~~~~~~~~~~~~~~

之後輪到難忘事 , 通宵車呢一段實在令人回味無窮 .

"北海道" 呢個地方 , 日頭都已經冇乜車 , 夜晚就更甚 , 

行了好耐都係無人地帶 , 特別係由 "知床斜里" 

入 "知床" 中途果條大直路 , 任你飛車之餘 , 又聽到車外陣陣風聲 , 

真係好刺激架 , 仲有再入多小小 , 馬路兩旁有D鹿有時橫過馬路 , 

果陣車速又要相對減慢 , 總之萬事執生啦 .  ^^

不過該篇網誌刊登之後 , 好多Blog友話危險 , 擔心我出事 , 

嚮度再次感激各界既關心 , 但我又唔可以保証唔會再試通宵車 , 

總之就多謝大家關心啦 .

~~~~~~~~~~~~~~~~~~~~~~~~~~~~~~~~~~~~~~~

另外講失敗經歷 , 又係同通宵車有關 , 

就係參觀完 "水中展望船" 之後 , 應該連隨去埋 "神威岬" , 

但果陣又驚參觀埋唔知要幾耐時間 , 皆因搵料時睇地圖 , 

覺得由 "積丹半島" 去 "知床" , 係一段極之遠既路程 , 

所以攪到連 "神威岬" 都過門不入 , 依家再睇 "3J家庭" D相 , 

果度真係靚到冇朋友 , 早知果陣就谷盡都去埋啦 , 失策 !

( P.S. : 其實唔去係正確既 , 皆因明年再度光臨 "神威岬" , 

參觀果度需時起碼個多小時 , 實在唔適宜在趕時間中參觀 .)

~~~~~~~~~~~~~~~~~~~~~~~~~~~~~~~~~~~~~~~~~~~~

下一單 : 大霧 ~ 雖然天氣既野無人知 , 不過大霧真係好影響心情 .

好多海邊既 "XX岬" , 只能夠聽到海浪聲 , 

唔能夠睇到全景 , 真係好唔高興  .  >_< !!

而難忘事仲有 , 就係參觀左當地好多 "北方四島" 資料館 .

尤其係家陣 "釣魚台" 事件攪到慶合合 , 人地 "俄羅斯" & "南韓" 都做左野 , 

"中國" 幾時先肯出招呢 ? 呢D野始終都唔應該由民間發起 , 

理應由政府做野 , "美國" 都係靠嚇既唶 , 

我就死唔信佢夠膽真係出兵還拖 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~

回顧就寫到呢度 , 都係時候展望下次行程 , 

下次既出門 , 希望於 "英超" & "歐聯" 收咧之後 , 

而地點將會係 "青森" , 但係我又想去埋 "北海道" , 

究竟點樣先可以將呢兩個地方串連埋一齊呢 ?難道要放下身段黎個 JR之旅 ? 

但在 "日本" 冇車既話就等於冇左對腳 , 所以呢個問題 , 

將會係我呢9個月既任務 , 而最佳偷師既地方 , 

莫過於大家既網誌 , 有時間將會慢慢探訪你地 .

Bye Bye !

P.S. : 明年既行程 , 就係乘渡輪連人帶車來串連 "青森" 與 "北海道" ,

網誌亦經已完成 , 再一次多謝各界支持 .