Hello !
上回講到剛抵達 "奧尻島" , 呢篇繼續 .
離開碼頭後 , 向第一個目標 "球島山" 進發 .
中途經過其中一間租車&單車舖頭 , 不過冇開檔 , 都打了個突 .
可能唔係旺季掛 ? 基本上個島都冷清清 ,
D人落船都唔知去晒邊度 ? 唔緊要啦 , 攪掂第一個景點先講 .
~~~~~~~~~~~~~~~~~~~~~~~~~~~~~~~~~~~~~~~~~~~~
如果係前朝讀者 , 應該知我在島上第一個回合落得慘敗收場 .
計劃行程時 , 預算第一日以步行方式 , 首先上 "球島山" ,
之後 "賽の河原" , 跟住就落番 "宮津弁天宮" , 最後就往旅館 .
全程大約5小時腳程左右 , 其實當中好多野係計漏 ,
就好似體能方面 , 個背囊有樽水與平板電腦加埋其他野已經好重 .
仲有一路都係上斜 , 即使有行山拐杖 , 都唔幫到幾多手 .
而且落船之後 , 一直落緊微雨 , 我諗住上到山上可能停雨 ,
甚至陽光普照 , 可惜事與願違 , 仲係180度果隻 .
一路上山 , 路上既指示認真不足 , 幸好分叉路都唔算太多 ,
但係雨勢又大多DD , 擔住把遮總算勉強頂得住 , 可惜好景不常 ,
行了大約一個小時左右 , 體力都消耗唔小 , 呢個時候山上風勢頗急 ,
即係久唔久一陣強風 , 類似三號風球果隻 , D雨吹到打橫咁黎 ,
把遮即時反骨 , 真係好谷氣 , 另外由於沿途冇乜指示 ,
路線全憑記憶 , 但係行極都未到 , 形勢又咁惡劣 ,
再加上我D衫褲都幾近濕透 , 攪到陰寒陰凍咁 , 所以即使去得到 ,
都未必有著數 , 山上天氣可能更差 , 如果呢個時候放棄掉頭 ,
要行一個小時落番碼頭果度 , 繼續行又無了期 ,
可謂進退兩難 , 不知如何是好 ?
~~~~~~~~~~~~~~~~~~~~~~~~~~~~~~~~~~~~~~~~~~~~
就在呢個時候 , 注定我命不該絕 , 有部小貨車駛過 ,
經過我十多呎後 , 入後波倒車停在我身旁 , 開車門揮手示意我上車 .
(其實我都冇出 "手指公" 順風車手勢 , 因為唔知人地肯唔肯?)
呢個時候 , 終於明白點解之前睇 "順風車大姦殺" 之類電影 ,
死者咁都肯上人部車咁戇居 , 原來實際情況真係冇得揀 ,
果一刻唔好話司機係位啊伯 , 就算額頭鑿住色魔兩個字 ,
都要照上車 , 最多上到車先至隻揪 , haha ...
上到車裡 , 我指住地圖後面印住既 "大須田" 旅館 ,
(個人都就死咁滯 , 唯有返旅館先啦 , 都冇乜行程咯)
佢講一堆我唔識聽既日文 , 我係咪都照點頭 , 於是乎開車 .
之後一路行車 , 但同我心裡面既路線圖有D分別喎 , 唔通 ...
不過都靜觀其變啦 , 一直落到山下 , 天氣稍為好轉 , 佢駛到一間旅館停車 ,
終於明白上車時佢講果堆日文係乜意思 ,
原來係話依家送貨先 , 攪掂先送我去旅館 .
~~~~~~~~~~~~~~~~~~~~~~~~~~~~~~~~~~~~~~~~~~~
雖然地濕濕 , 不過同山上比較 , 已經好好咯 .
新雪櫃 ~ 唔該收貨 . (戴帽果位啊伯就係司機)
全靠呢部小貨車救命 , 當然要多謝司機仗義幫拖 .
就係呢間民宿入貨 , 仲未開業 , 可能未裝修好掛 ?
右邊係新機 , 左邊係舊貨 , 新機果然靚好多 .
回收番舊機 , 綁穩陣D呀 . haha ...
攪掂繼續出發 , 呢度係島既另一邊 .
影多幾張相先 , 因為果刻我仲未知道下一部點行 .
好靚既海岸 , D雲都怪怪地 .
由於冇預有乘客 , 所以袋工具都要放上大脾 . XD
又幾好天喎 , 真吹漲 . =_= !!
不過開始上山 , 又黎料 .
開水撥丫 , 唔該 .
邊行邊落雨 , 如果唔上車 , 又變落湯雞 .
Wow ~ 好靚既海灘呀 .
上山中 ...
雖然係啊伯 , 不過手車都幾辣 , 有時開到80km .
果一刻我在度盤算 , 之後行程點算呢 ?
如果聽日又係咁既天氣 , 咁咪邊度都唔駛去 ?
不過果陣個身濕晒 , 都係返到旅館先算 .
見唔見前面上空一片霧氣 .
頭先就係類似咁樣既情況下行上山 .
唔講唔知 , 除落雨之外 , 出面仲好大風 .
過左最壞既情況 , 向落山方向行 , 山下天氣又好番D .
差唔多到達旅館果陣 , 佢指住後面 , 跟手指地圖上旅館果度 ,
打個交叉手勢 , 可能佢以為我搵旅館時 , 行錯路上山 .
我想話俾佢知 , 其實唔係 , 我第一站諗住上 "球島山" ,
之後兜個大圈先去旅館 Check in , 不過以我既日文水平 ,
恐怕都好難講得出我以上呢番話 .
到達旅館後 , 同佢一齊入去 , 我就辦理 Check in 手續 ,
佢入內堂同老闆吹水 , 好似好熟咁喎 ,
唔怪得一俾佢睇旅館個名 , 佢即時知訂 .
攪掂後諗住落番黎向佢再三道謝 , 點知佢都走左 ,
算啦 ~ 所謂大恩不言謝 , 好多野心照就得 . haha ...
我都返房回一回氣 , 沖個涼整乾個身先講 .
Bye Bye !
沒有留言:
發佈留言
歡迎光臨 , 如果時間許可 , 請留番個言丫 ~