2013北海道&青森12天自駕遊(修訂版)D3-6完(旅の宿大須田晚餐篇)

Hello !

上回講到參觀完房間 , 呢篇繼續 .

返房休息及上網 , 話都冇咁快就到晚飯時間 , 

由於頭先冇乜點食過野 , 依家鬼死咁肚餓 , 

今日都算歷盡艱辛咯 , 所以坐落第一件事就啤一啤佢 .

連菜單都Print埋出黎 , 夠晒認真呀 .

佢好有心機介紹每一味菜 , 不過呢頭講完果頭都唔記得啦 , 

正式係左耳入 , 右耳出 . haha ...

平成二十五年五月十一日 , 旅之宿大須田 . 

(大須田知行係人名黎架)

食堂在地下 , 上篇介紹過啦 .

正宗日式打坐咁食法 , 雖然我鍾意 , 不過若然挖個窿擺腳 , 

咁就舒服好多 . (遲D "秋田" 果度 , 真係有架)

電視撈飯 , 咁先至係波架嘛 .  ^_^ !!

我都冇著浴衣落黎食飯 , 只係普通衫褲咋 ,

開始時佢向其他人介紹 , 話我由 "香港" 黎 , 個個都望住晒 ,

攪到人地鬼咁唔好意思 , 真係多得佢唔小 . XD

開始食飯 , 對唔對得番張菜單呀 ? 我就唔得喇 .

不過都嘗逐味介紹啦 , 第一味 : 醬油魚 .

刺身 .

天婦羅 .

漬物 .

唔知乜野 ? (懷疑係蘿蔔)

呢味雖然經常見到 , 不過都唔知乜野黎 ?

呢兜飯要食晒都唔簡單 .

麵豉湯 .

唔好睇每樣好似得小小 , 全部食晒都幾係野 ,

食完返房繼續睇電視 , 適逢做 35歲の高校生 .

套劇講D乜 ? 近日報紙都有介紹 .

唔講唔知 , 我一向都鍾意睇 "米倉涼子" D劇集 , 

佢多數都飾演D硬掘掘既角色 , (似足我既性格)

好似之前既 "講數阿姐" 系列 , 就聽朝11:00 ,

TVB翻做佢果套 "追稅女王" , 又係好好睇架 .

雖然扮學生有D吃力 , 不過我鍾意睇佢 , 多過 "菜菜子" .

睇完休息多一陣 , 出去梳洗過後就訓覺 , 

呢度勉強都叫做有溫泉浸 , 其實只係一個浴缸 , 中午入住時在特別情況下 , 

先浸一陣 , 正常情況係唔會浸 , 等遲D大浴場果陣先浸餐飽啦 .

Bye Bye !

第三日完 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

一宿無話又到聽朝 , 同場加映第四日早餐篇 .

由於約佢A.M.10:00在門口等 , 所以唔駛咁早起身 ,

A.M.8:15先落去食都未遲 .

早餐又係尋晚原班人馬一齊 .

都係同一個地方 , 同一個位置 .

唔同既係晨早流流 , 唔會飲啤酒囉 .  ^^

望出窗外 , 幾好天喎 , 証明租車係正確既選擇 , 好彩冇揀Plan A咋 .

早餐到 .

同晚餐差唔多既 ? 只係 "醬油魚" 變成 "柴皮魚" .  =_= !!

加多味煎蛋 & 煙肉 .

呢盒係好惡哽既 "納豆" , 食唔食好呢 ?

仲有味 "日式" 鹹肉粽 , 綠色果D係砂糖 , 不過唔算太甜 .

(咦 ~ "日本" 有冇端午節架 ? )

其實尋晚果餐都仲未落晒格 , 再加埋呢餐 , 

真係飽到冇朋友 , 食完仲有時間剩 , 上房收拾細軟之後 Check out .

用呢段時間四圍行 , 等到10:00再返黎取車 .

呢間就係旅館外貌 .

隻狗咁搶鏡 , 點可以唔玩番兩手 .

Wow ~ 埋緊黎呀 . 

正式係又要玩又要驚 . haha ...

藍天白雲 , 同尋日真係兩個世界 .

玩完狗就出外面散步 .

同佢講聲 : すみません , さんぽします , いってきます .

唔知文法正唔正確 , 不過我淨係識呢D .

旅遊日文仲講乜鬼文法丫 , 求其佢聽得明都偷笑 .  XD

再一次 Bye Bye !

下篇正式租車出發 . Yeah ~