2015/05/24

LG 42UB8200 (開箱文)




Hello !


攪左幾個星期既 LED TV 選購事件 , 終於塵埃落定 . 

並於日前正式收貨 , 揀左既就係 Blog友 t 推介既 LG 42UB8200 .

(在此特別嗚謝 t先生既好介紹)   ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

至於點解揀呢部 ? 其實純粹投緣 , 皆因部部睇落都係差唔多 , 

真係好難揀架 , 而價錢呢 ? 網上既 Price 網站平均價錢係 $5480.00

我在百老匯入貨 $5980.00 雖然價錢比較貴 , 不過包送貨 & 安裝 , 

仲有其他野送 , 拉上補下都可以接受 , 就當係大舖頭既信心保證啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

落單之後就等送貨 , 送貨及安裝同一日內攪掂 , 不過就分開兩次 , 

所以要同公司請假收貨 , 休足一日冇得走雞 , 而襯頭尾時間順便執屋清潔 , 

平時唔多覺 , D萬年塵真係抹到手軟 , 原來執屋比開工還要辛苦 . 

當日上午首先收到部電視 , 不過唔好郁佢住 , 等師父上黎安裝 .

依家講解一下除左部電視之外仲包D乜野 .

首先係主角 ,  LG 42UB8200 一部 , 請查收 ~


雨遮一把 . (呢樣啱用呀 , 屋企正缺長遮)


4K HDMI線一條 . (1.8m)


電視天線一條 .


Hyundai 500GB 2.5" 硬碟一個 .


LG BP135 藍光碟機一部 .


大家樂贈券 . (頭先已經用左)   ^^


收齊貨之後 , 等師父上黎安裝 , 上到黎首先拆開包裝盒 , 

拎部主機出黎 , 再用螺絲上腳架 , 跟住將電芯入落遙控器 . 

就係呢個遙控喇 , 古古怪怪咁 .  XD


插好電源及天線就可以開機 , 首先部機確認個遙控 , 跟手就係Set台 , 

Set齊晒十零個台之後 , 係咁咦再講解一下 , 簽收就可以鬆人 , 

過程相當簡單 , 自己攪掂都得 . 

我諗其實師父上黎安裝最大既意義 , 就係由佢拆箱証明部機冇穿冇爛 ,

否則死無對証 , 口同鼻拗就無謂啦 .  =_= !!

另外一樣要講既就係佢既說明書 , 印得非常簡單 , 好多功能都係靠自己慢慢摸索番黎 , 

印詳細D都唔怕死啦 . (不過又唔係咁深奧 , 慢慢摸索始終都會攪得佢掂)

開機節目示範 , 星期五晚明珠台 賈神探 ~ 


H&M 廣告 .


部電視42吋 , 在電器舖陳列果陣又唔覺得大部 ,

放在屋企覺得都幾大部喎 , 畫質仲好掂添 , 

一陣英超煞科大戰可以慢慢欣賞 , 正 !!

Bye Bye ! 

P.S. : 佢話個紙皮箱唔好掉住 , 十日內有乜問題可以一換一 .

2015/05/22

送左黎喇




 Hello ! 


等左咁多日 , 部電視終於送到 , 

不過仲有好多細節位要學習 , 等到星期日先黎個詳細匯報 .

Bye Bye ! 

2015/05/17

最後入圍四強




Hello !


又一個星期 , 本周對於我黎講既熱話 , 都莫過於選購電視 .

不過先叉開一陣 , 講小小其他野先 , 話說收工時途經荷里活廣場 , 

地下大堂攪左個車展 , 擺左幾部車任人攪 , 我都襯下熱鬧 , 

混吉地坐上司機位感受一下自駕遊氣氛 , (講過好多次) , 本來呢段時間即將出門往北海道 , 

可惜發生年頭果件事 , 行程被逼告吹 , 雖然已經放下 , 不過今年都唔會出門咯 . 

一年好快過既唶 , 期滿果陣大約係2016札幌雪祭 , 到時再籌備過啦 .

(依家連大暑天時都未到 , 咁快就講雪祭 , 好似怪怪地咁)  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

言歸正傳 , 呢幾日午飯時都蛇出去睇電視 , 真係要用睇電視黎形容 , 

皆因佢地播放果D Demo碟對於仲睇緊大牛龜+機頂盒既我 , 

真係睇到嘩嘩聲 , 正式係劉姥姥進大觀園 , 部部都咁正 , 亦因為咁 , 

攪到日日都腦交戰 , 似足在 樂天網站 揀酒店咁 .  ^_^ !!

而當中仲有好多疑問 , 首先乜野係4K ? 好似話係3840X2160解像度 , 

依家既高清台解像度1920X1080 , 都已經唔差 , 駛唔駛咁激呀 ?

如果要睇4K , 需要D乜野呢 ? 4K播放碟機 & 4K電影碟 ?

好似唔見市面上有喎 ? 咁咪即係得物無所用 ? 

不過睇左幾日電視 , 終於都揀到幾部入圍 , 分別係 :

 KDL-40W700C

SHARP-LC-40S3H (呢部機會好微 , 只係打錯左)

PANASONIC TH-40CS620H

LG-42UB8200

LG-40UB8000


就係以上呢四款喇 , 相信都係是但一款 , 點解冇三叔呢個品牌入圍呢 ? 

緣於人言可畏呢四個字 , 在網上討論區見到好多人話三叔機既售後服務差 .

雖然唔知係咪 , 之但係咁多人講 , 就算係大話 , 講得多都變真啦 , 

所以今次完全冇諗呢個牌子 , 如果有Samsung高層睇到呢篇網誌 , 

咪話我唔單聲 , 日後記得請多D網上打手在討論區補飛 , 

讚到天上有地下無 , 我就係因為睇得多負面報導 , 所以先對佢冇信心 .

另外有個網站叫做 Price , 佢介紹果D舖頭開價平過 豐X 同 百X匯 好多個百份點 , 

即使扣除佢送果部藍光碟機 (佢話價值 $630) 都平過佢地好多 , 

果D舖頭靠唔靠得住架 ? 咁多位Blog友有冇幫襯過佢地 ?

講住咁多先 . Bye Bye ! 

2015/05/11

沒有電視的日子




Hello !


近排比較多野煩 , 攪到好似好耐冇寫網誌 , 

襯今晚有D時間 , 一於整番篇先 .   ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

咁究竟煩D乜呢 ? 其中一瓣就係煩電視 ...

話說早排部電視機 , 睇睇下竟然會自動熄機 . 

(如果睇緊恐怖片 , 肯定嚇餐死 . haha ... )

遇到咁既情況 , 通常即刻開番機就冇事 , 所以都唔多理佢 , 

不過近排自動熄機既次數 , 越黎越頻密 .  =_= !!

就尋晚之嘛 , 熄左機之後 , 就算即刻重開都冇反應 , 咁就大鑊 ...

(好彩隔半個小時之後再開機又OK咋 , 否則英超都冇得睇)

果刻先至發現 , 原來電視機對我好重要 , 

而我諗部電視都唔捱得幾耐 , 都係時候搵部新機 . (又要破財)

今日去左豐澤度參觀 , Wow ~ 認真花多眼亂 , 呢款覺得唔錯之餘 , 

果款又好似好正 , 對於我呢類有選擇困難症既人黎講 , 

真係一個好大既難題 , 另外聽人講過 , 呢味電視唔係好襟用 , 

頂多都係3幾年貨仔就Bye Bye , 買得太貴都冇乜意思 .

唔知咁多位Blog友有乜野好介紹 ? 或者邊個牌子好D , 

邊個牌子千祈唔好買 ? 仲有 ~ 假設真係買左部新機 , 

咁舊果部點算 ? 倘若賣俾D印巴佬 , 佢地運返佢祖家 , 

就算修理好佢再用多3幾年都係壞機 , 到時佢地都唔駛慌有乜野環保處理 , 

咁樣點對得住下一代 ? 呢個都係一個難題 .

呢刻都係集中火力諗買邊一款機先啦 , 果D遲D再諗佢 .

Bye Bye ! 

大牛龜電視 , 正式係買小見小 .  XD


2015/05/04

站長 ~ 生日快樂




Hello !


未開始之前 , 首先恭喜 車仔 勇奪英格蘭超級聯賽冠軍 ,

車仔今次攞呢個冠軍 , 正式係實至名歸 , 皆因全季幾近由頭帶到落尾 , 

途中只係輸過兩場波咁大把 , 可惜歐聯出局 , 不過又有番個盃仔 , 

叫做雙冠王咁啦 , 做人總唔能夠太貪心 , 依家咁樣都心滿意足咯 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今日頭條 : 和歌山花貓站長慶16歲生日 .  ^_^ !!


返番正題 , 日本和歌山電鐵貴志川線站長 阿玉 , 相信無人不識 .

日前16歲生日 , 為左隆重其事 , 該站為牠舉行了一個生日會 , 

唔講唔錯 ~ 貓既16歲 , 相等於人類既80歲左右 , 都算唔簡單 .

講開呢個站 , 我就無緣一到 , 只能透過Blog友Shirley姐既網誌一睹該車站 ,

如果有Blog友曾經探訪過佢 , 請通知聲 , 等我上去參觀一下 .  ^^

另外站長阿玉都成16歲 , 接近退休年齡 , 都係時候搵接班人 , 

而站裡面既副手二玉 , 隨時可以暫代其職務 , 替阿玉代勞 .

今晚講住咁多先 . 

Bye Bye !

2015/05/03

DIY更換水龍頭




Hello ! 


話都冇咁快又到星期日 , 本周對於我黎講有兩單大事 .

第一單係車仔提前攞英超冠軍 , 只要今晚果場能夠擊敗水晶宮 , 

就算次席既阿仙奴餘下賽事全勝都冇用 , 希望今晚能夠攪掂佢 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另一單就比較切身 , 就係日前發現浴缸水龍頭有漏水跡象 , 

起初以為只係水尾 , 點知即使扭到幾緊 , 都不停咁滴水 , 

雖然唔算好嚴重 , 不過始終都困擾 , 試過搵個膠盆裝住D水 , 

一晚過後都滿到瀉 , 咁就非解決不可咯 .  =_= !!

漏水呢樣野 , 有兩種可能 , 一係就水喉皮蝕左 , 一係就真係壞左 .

再睇下個水龍頭 , 都用左相當時日 , 費時換水喉皮 , 換個個新款好過 . 

所謂長痛不如短痛 , 反正一個正常既水龍頭 , 應該用到好多年 .

睇呢個就知啦 , 起碼用左十年以上呀 . 


之但係若然搵人黎換 , 連工包料都幾係野 , 早排依稀記得睇過

Blog友 Maggie & Kaykie 既 DIY維修水龍頭 網誌 , 應該都唔係太難 , 

相信自己黎都攪得掂 , 咁就無謂俾錢人賺 , 慳得就慳嘛 .  ^_^ !!

於是乎出去買料 , 市面上都有好多款式 , 求其揀一款算數 , 

反正是但一款都會新款過依家用緊果隻 .  XD

就呢款啦 , 四四正正咁 , OK啦 . (連同所有配件)


順便換埋條花灑喉 , 長D好用D . 


準備好未 ? OK就開始 , 第一件事係關水掣 , 電視劇都睇唔小啦 , 

好多主角就係忘記關水掣 , 攪到間屋一鑊粥 . haha ...


首先用士巴拿鬆開兩邊螺絲 , 拆走舊水龍頭 .


裝上新配件 , 基本上呢兩塊野可有可無 , 不過橫掂俾埋 , 順手裝埋佢啦 .


入番兩個膠圈落去 , 再對番兩個窿裝上去 , 上緊就OK .

拆走舊果個就冇所謂 , 安裝新水龍頭果陣 , 記得用毛巾包住粒螺絲黎擰 , 

否則刮花晒粒螺絲就唔係幾好啦 , 切記 !!


出去開番個水掣 , 試過D水 , 掂呀 !!


就係咁樣 , 非常之簡單 , 如果俾人換 , 要約時間之餘又要俾錢 , 

費時失事 , 最重要係DIY , 好玩好多 , Yeah !

Bye Bye !

P.S. : 今晚P.M.8:30 nowtv 621台 , 車仔封王戰 , 約定你地呀 .  ^^