2015/11/29

2016 行程初盤 (第五日行程)




Hello !


今日係星期日 , 係寫行程既好日子 ...

早兩日報紙話 北海道富良野 果頭 , 氣溫跌至零下20度 , 

由於事出突然 , 天文台都報唔切 , 所以俾民眾鬧爆咁話喎 .

Wow ~ 高速公路收費亭都攪成咁 , 點行呀大哥 ?  XD


零下20度 , 令我諗起當年參觀 紋別 果個 オホーツク流氷科学センター

果度有個寒流體驗室 , 裡面正正就係零下20度 , 

等閒既裝備根本就頂佢唔順 , 正式係凍都啊媽都唔認得 .

好彩仲有兩個多月先至出發 , 希望到時唔好咁激啦 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講番個行程 , 上回講到住在 ホテルねむろ海陽亭 , 

而呢日既目的地係 知床 , 離開旅館第一站就係 : 春国岱

果度上次已經參觀過 , (其實都冇乜野睇) 不過係必經之路 , 

就當係停低影張相咁啦 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住就係 : 道の駅スワン44ねむろ , 唔知佢日劇 南極大陸

既宣傳海報拆晒未呢 ? 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再跟住就係 : 新酪展望台 , 即係果個鐵架展望台 , 好似唔多穩陣咁 .  

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後繼續上 , 去到 白鳥台 , 果度又叫做 :別海北方展望塔 , 

有好多北方四島既資料 , 希望到時視野會好D啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再上就會見到 野付半島 , 兜唔兜入去呢 ? 呢D地方夏天黎先至有野睇 .

如果唔入去 , 繼續行有兩個景點 , 不過都曾經參觀過 , 

分別係 : 北方領土館 & 標津三文魚科學館 , 又係睇心情啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

由於唔可以經 知床峠 去 知床 , 所以要兜下路入去 , 

即係由 知床斜里 果頭再經 龜島 入 知床 , 浪費晒D時間 , 

再加上雪地行車唔敢太快 , 所以今日景點唔係咁多 , 

去到 知床 如果有時間 , 希望可以去 フレペの滝 重溫當日既意境 , 

否則就要隔日先至上去 , 當晚既酒店已經搵到 , 仲Book埋添 .


不過俾 ウトロ温泉知床第一ホテル 截左糊 .

~ 就係佢喇 ~


個溫泉正到殺死人 . haha ...


第五日完 !!



2015/11/23

OTS 北海道唔租車




Hello !


今日頭條 : 冬季自駕遊危險 , 北海道暫停旅客租車 ...


今日對於我黎講 , 至爆既新聞並非選舉結果 , 

而係呢單OTS北海道租車公司 , 暫停租車俾外國旅客 .

OTS網頁既通告 . (中文版)


報導話外國人雪地駕駛經驗淺薄 , 暫時都係唔租俾你地 ,

 費時你地炒大鑊 , 等雪季過左先至再玩過啦 . (大至上係咁啦)

其實呢單OTS冬季拒租車俾外國客 , 早已從Blog友中略有所聞 .

而講開冬季自駕遊 , 近排亦有Blog友問我有冇雪地駕駛的經驗 ?

我介紹佢睇我2011年既 : 雪地自駕遊經驗之談篇


不過該篇所謂經驗之談 , 只屬取巧性質 , 皆因我既雪駕經驗 , 

只限於天清氣朗既雪地 , 真正漫天風雪能見度低既情況 , 我都未試過 .

我諗如果在高速就冇得好講 , 若然普通馬路遇到大風雪 , 

都係唔行好過行 , 頂多買定D乾糧在車上等 , 平定先至開車 .

講番OTS今次決定 , 對我影響不大 , 因為我係Toyota忠實Fans .

大吉利是講句 , 萬一Toyota又玩呢招 , 咁就真係杰撻撻咯 .

訂好既酒店都要取消 , 只能改為在 札幌 市內觀光 , 

希望唔好啦 , 最多我小心D駕駛 , 盡量唔整臭港人個朵 .

Bye Bye !


2015/11/22

2016 行程初盤 (第四日行程)




Hello !


隔左兩個星期 , 今日又輪到寫行程初盤 ,

上回講到在霧多布果頭落腳 , 而今次落腳地 , 將會係根室 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

由果度去根室 , 車程只需個再零鐘 , 不過當然唔會咁簡單 , 

仲有景點要遊覽嘛 , 第一個景點係 : なぎさのドライブウェイ

果度係一個長長既沙灘海岸 , 可以望下海 , 我就至鍾意架啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住下一站係 : 羨古丹駐車公園 , 又係一個睇海既地方 , 

呢度上次曾經一遊 , 不過又係受大霧影響景觀 , 希望今次好D啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後就係 : 北太平洋シーサイドライン , 網頁話呢度係100選入圍地方 , 

就算行過都要落去望一望佢 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再黎就係 : 落石岬 , 果度有個燈塔 , 燈塔又係我的最愛 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住呢個犀利喇 , 叫做 : 根室車石 , 不久前睇過Blog友 Fung Mandy 

既大作 , 真係羨慕死人 , 今次又要睇天做人 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後呢個 : 納沙布岬 , 絕對係呢日既重中之重 , 

如果好天氣既話 , 呢度可以磨佢好耐 , 好多野睇架 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

玩到呢度都差唔多 , 當日既旅館亦都揀好 , 仲Book埋添 , 

叫做 : ホテルねむろ海陽亭 , 呢度上次曾經入住 , 

晚餐去左正宗 根室花 食迴轉壽司 , 今次會一試旅館內既晚餐 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

~ 第四日完 ~

Bye Bye !


由酒店往根室花 , 步行大約15分鐘 . 







2015/11/20

突發事件 ~ 深水埗間歇泉篇




Hello !


自從由Yahoo搬過黎呢度之後 , 好耐冇寫過突發事件 , 

需知呢D野 , 可遇不可求 , 有時就算遇到 , 身上未必有相機 , 

好似呢篇咁 , 就係用手機黎影 , 質素當然差小小 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次事發地點係深水埗 , 南昌街 與 基隆街 交界公園 , 

時間係 2015年11月20日 , 下午3:30左右 .

當時啱啱經過上址 , 發現有野睇 , 當然唔好錯過啦 , 

原來就係爆地下水管產生間歇泉 , 與其話間歇泉 , 

不如話小型湧泉貼切D , 不過我鍾意間歇泉個名唶 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講左咁耐 , 一齊黎欣賞下呢個間歇泉啦 , Yeah !!

~ 就係呢度喇 ~ 


幾勁喎 .  ^^


黎多張添 .


有警員在場駐守 , 以防萬一 .


D水夾雜沙泥 , 湧向對面馬路 .


不過唔算好勁 .


車輛駛過都冇收油 , 照剷過D水 .


唔知係鹹水定係食水 ?


聽日報紙會唔會登呢 ?


繞場半周再返黎 , 現場睇加埋D聲勁好多 .


Zoom近小小睇 .


最後一擊 , 影完鬆人 , 我都驚佢突然大爆發 . haha ...


今日係咁先 , 第日再有突發事件再報導過 .

Bye Bye !



2015/11/17

甜到漏 ~ 酸梅湯




Hello ! 


頭先睇完 J2 果場直播 世界盃外圍賽 , 

香港 vs 中國 , 忽然Blog癮大發 , 夜小小都整番篇先 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好話唔好聽 , 香港既足球水準 , (可能睇得表演賽多)

簡單D講就係 輸小當贏 , 直到今次世界盃分組賽 , 

有兩隊比港隊更加魚腩既出現 ,分別係 不丹 & 馬爾代夫 .

再加上中國隊既 有層次 言論 , 令到呢個小組賽事多左人睇 .

講番頭先場波 , 未開賽之前 , 我諗住中國隊必勝架啦 , 

(好彩足智彩冇開盤咋 , 否則賭埋條命都買佢贏 . haha ... )

因為無論實力或者陰謀論 , 點計都係中國隊贏 , 

點知世事往往就係咁邪 , 同上次港隊深圳作客一樣 , 

撞柱多過食飯 , 有球明明龍門在網內撈個波出黎 , 咁樣都判唔入波 , 

真係咁都得 ? 整定中國隊唔好彩啦 .   >_< !!

依家和波各得一分 , 打後點計數 , 真係冇人知 ?

邊個出線都冇所謂啦 , 正所謂 : 冇期望就唔會失望 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

仲有時間 , 黎多單添 , 消委會話市面上既中式飲品糖份過高 .

包括我喜愛既酸梅湯 , 酸梅湯呢樣野 , 基本上係一樣好酸既飲品 , 

要整得好飲既話 , 一定要用大量既糖份黎蓋過佢既酸味 , 

所以酸梅湯糖份過高 , 我一D都唔感到奇怪 .

如果唔想甜過龍 , 可以加冰黎飲 , 正 !

剛剛買左兩支 養生家族 既 酸梅湯 , 幾好飲架 .  ^^


除左加冰之外 , 我最鍾意加埋梅酒 , 加小小落去 , 好飲好多 .

紀州蜂蜜梅酒 , 阿信屋度買 , 折實50幾蚊左右 . 


今晚講住咁多先 . 

Bye Bye !



2015/11/15

トマム 星野リゾート 水の教会




Hello !


今日本來應該講行程初盤篇 , 可惜又係果句啦 : 未攪掂 .

唯有求其搵D野黎頂檔 , 講乜野好呢 ? 就講日前與Blog友談及既 : 水之教會 .

就星期五果日 , 友季姐 留言 , 話 : Oh! No! 可以不去了sosad ...

當時我R晒頭 , 心諗 ~ 可以不去 ,Why ? 再上佢留低既網址度睇 , 

原來係講 北海道TOMAMU度假村 俾中國某財團100%收購 .

咁大單新聞 , 點解唔多覺既 ? 因為星期五既報紙 , 成本字典咁厚 , 

淨係逐頁揭都揭到手軟 , 有D兩頁當一頁 , 所以Miss左都唔知 .

跟住翻查一輪 , 終於搵到佢喇 , 星期五 AM730 報導 .

北海道水之教堂 , 中國財團擲11.5億收購 .


講起呢個 トマム 星野リゾート 度假村 , 我有幸去過一次 , 

詳細可以Click入呢度 , 果度俾到我既感覺係正到爆之餘 , 

仲節目多多 , 去一次絕對玩唔晒 , 印象最深刻既 , 莫過於佢既房間 , 

似一個家居單位多過一間酒店房 , 黎緊呢次北海道之旅 , 

都有諗過佢 , 只可惜農曆年期間唔止貴之餘 , 仲好難有單人房 ,

所以打消左個念頭 , 經過呢一別 , 恐怕後會無期 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

唉 ~ 冇辦法啦 , 所謂商業決定 , 冇乜邊個敵得過銀彈政策 ,

一堆堆銀紙咁掟過黎 , 唔通企硬唔賣俾佢咩 ?

在於(我呢個)旅客立場 , 對果度興趣大減就在所難免 , 

皆因咁難得先至出門去日本 , 都唔多想見到日本以外既人 , 

而佢整個度假村被收購 , 難免一車車強國人進注遊覽 , 

碰口碰面都係佢既人 , 氣氛好似返左內地 , 咁就蛇都死啦 .

如果有Blog友去開果頭 , 唔該報一報料 , 

睇下災情如何 , 仲可唔可以一遊 . 

Bye Bye ! 


2015/11/13

換廁紙架 DIY




Hello !


屋企廁所個廁紙架爛左都好多個年頭 , 

一直都拖得就拖 , 忍得就忍 , 今晚終於的起心肝解決佢 .

就係佢喇 , 本來面上有個蓋 , 不過爛左 , 暫時都係用住先 .


買左個新既 , $18.00 是但一間家品店有售 .


先將舊架拆除 , 再係咁咦清潔牆身 .


照番D螺絲位上個新架 .


最後一Part就係裝番廁紙 .


其實換廁紙架呢樣野 , 可以話係手板眼見功夫 , 

根本不值一晒 , 呢篇最想帶出既訊息係 : 

有時有D野明明就在眼前 , 不過就硬係抽唔出時間解決 .

日日都話遲D先 , 依家攪掂晒 , 係咪好正呢 ? haha ...

Bye Bye ! 



2015/11/11

白浜温泉 崎の湯




Hello !


今日頭條 :  中國遊客男扮女裝 , 闖日溫泉女湯自拍 ...


呢一單料係尋日報紙新聞 , 話說有一名中國籍遊客 , 

竟然男扮女裝 , 潛入女湯溫泉 . 並在眾目睽睽之下用手機自拍 , 

被捕獲後辯稱 : 女湯呢邊風景特別正 , 所以才犯案 .  >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

今次呢篇新聞 , 想講兩樣野 , 

第一就係 : 日本開放內地旅客賺人仔 , 唔多唔小都要負出代價 , 

呢方面可以向香港借鏡 , 呢單案確實係疑點重重 , 

疑犯話佢欣賞女湯風景 , 所以喬裝女性打扮進場及自拍 , 

雖然手機相片只係得佢自己 , 見唔到其他人 , 不過呢個理由都幾牽強 , 

報導話佢有同行女性朋友 , 如果想睇風景 , 可以叫女性朋友內進影相丫 , 

另外去旅行竟然帶同假髮 , 好難唔令人想到係組織咁樣犯案 ,

溫泉女湯俾男人進場 , (唔係混浴果隻) 仲唔虎入羊群咩 , 

肯定連渣都唔得剩 , 即使係欣賞風景 , 亦屬嚴重罪行 , 

希望日本警方嚴刑逼供來查証 , 黎個重懲不貸 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第二樣想講既係 : 案發地點 , 白浜温泉 崎の湯

我就暫時未有幸一遊 , 第一次認識該地方 , 全靠Blog友 Shirley姐 .

佢2014年9月19日有篇遊記 , 對果度有詳細報導 .

如果有時間 , 可以上去睇睇 , 好正架 .  ^^


講開和歌山呢頭 , 本來今年都想轉場會一會佢 , 可惜 ...

不過唔緊要啦 , 明年解決埋北海道 , 再下次就可以考慮呢度 , 

呢個 白浜温泉 崎の湯 , 就算冇呢單新聞 , 都可以話係必到之地 , 

更何況想發生呢單野 , 更加係非去不可 , 到時可以睇睇個女湯 , 

係咪真係堅得咁堅 ? haha ...

Bye Bye !

2015/11/08

2016 行程初盤 (第三日行程)




Hello !


隔左兩個星期 , 再黎行程初盤 , 

今日用左一個下午黎搵料 , 終於攪掂第三日既行程 ,

一齊睇下搵到咩野料 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第三日訂左個冇早餐Plan , 第一個景點就係 和商市場 , 

一嘗佢既 勝手丼 , (之前講過好多次) 雖然有Blog友覺得果度只屬普通料 , 

不過黎到 釧路市 都唔會一會佢 , 似乎有點兒那過 , 

就算唔計佢D食物 , 當佢做景點都係一個唔錯既地方 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住 ... 如果上日未攪掂 幣舞橋 果四個像 , 咁就解決埋佢 .

 之後就去近近地既 米町展望台 居高臨下 , 一睹釧路市既風景 .

睇完就過附近既 太平洋炭礦炭鉱展示館 , 其實果度有D乜野睇既呢 ?

好似係煤炭果類野 , 去到先睇下點 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

打後沿住海邊行 , (唔知有冇封路 , 希望冇啦) 目的地係 尻羽岬 .

下一站係 あっけし望洋台 , 講起呢個台 , 2012年黎果次大霧到爆 , 

乜野都睇唔到 , 天氣既野好難預計 , 唯有盡人事 , 聽天命 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再黎就係重頭戲 , 道の駅厚岸グルメパーク ...

呢個道の駅 , 黎過既人都知道 , 係一個食蠔既好地方 , 

上次試過BBQ , 今次N歌還是試其他食法 ? 去到先至決定啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

食完個蠔餐 , 過隔離 海事記念館 , 又係唔知有乜睇 , 去到至算 .

之後本來係 國泰寺 , 不過上次已經去過 , 今次最想去既係 : 愛冠岬 .

上次又係大霧啦 , 攪到雞毛鴨血 .  =_= !!

跟住黎呢個 涙岬 , 又係重中之重 , 希望今次睇得佢清清楚楚啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再之後去多兩個岬 , 就要往旅館 , 

首先第一個岬係 : アゼチ岬 , 第二個就係 : 霧多布岬

黎到霧多布呢度 , 呢兩個岬可謂非睇不可 . 

而旅館方面 , 亦都已經揀好 , 仲Book埋添 , 叫做 : 霧多布 旅館くりもと



停車場就在旅館後面 , 夠晒方便 .  ^^

Bye Bye !



2015/11/03

110V 日本電器




Hello ! 


今朝Blog友 Shirley姐 有關於日本電器既提問 , 

如果在留言度回答 , 恐防唔夠詳細 , 倒不如開篇網誌黎講下 .

都係果句啦 , 只係將我所知既攞黎分享 , 

如有錯漏 , 祈為指正 . ( 好有免責條款 Feel )  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

平時在日本旅遊時 , 有機會都會買番D小型電器 , 

就算同一款電器 , 感覺會比在香港買既正D , 話晒都係 Buy in Japan .

不過電壓方面就要注意 , 日本係用110V電壓 , 香港就用220V ,

若然買既電器係旅行裝火牛 110V-240V  (見圖)

咁只需要用轉換插頭就可以直接插落電掣使用 .


之但係若然係正宗日本電器 110V 的話 , 

咁就要小心 , 直接插落電掣既話 , 好大機會會燒機 , 

呢個火牛就係齋 100V , 千祈唔好就咁插落電掣 .


用得上述火牛 , 必然係小型電器 , 

只需買個輕型變壓器即可 , 呢個 60 WATT MAX , 

一般小電器用就綽綽有餘 .


好似好多年前好流行既日本電話 , 耗電量甚低 , 

只係 10V , 用佢就啱晒 Key 喇 .  ^^


如果係中型電器 , 好似呢部 Victor 微型HiFi , 

若然用上面果味變壓器 , 未必頂得順佢既耗電量 .


呢個時候就要用勁小小既變壓器 , 280W MAX


萬一係較大型既電器 , 好似日本版牛龜電視 , 

(呢部應該係絕版 , 想再買都難 , 依家出晒 LED TV )

或者係雪櫃之類耗電量甚巨既電器 .


就要用更大型既變壓器 , 1000W MAXIMUM , 

大大既電器都殺得起 , 冇有怕 . haha ...


至於乜野電器用乜野變壓器 , 部電器有寫幾大耗電量 , 

用之前睇清楚 , 買個合適既變壓器就OK , 

變壓器在鴨寮街既電器舖有售 , 唔好用錯呀 .

Bye Bye !


2015/11/02

Panasonic NA-F65G5 洗衣機 (開箱文)




Hello !


尋日星期日 , 點解唔見 "2016行程初盤" 出街 ? 理由有兩個 . 

第一 : 雖然知道路線 , 不過仲未搵景點 , 想寫都唔得 .

第二 : 就係早排忙於搵洗衣機 , 所以冇時間搵料 .

終於日前攪掂洗衣機呢Part , 可以繼續搵料 .

而呢一篇叫得做洗衣機開箱文 , 當然要好好咁介紹部機 .

一切就要由舊洗衣機開始說起 , 話說用緊果部洗衣機 , 叫做 : 愛妻號 .

(用左都好多個年頭 , 唔記得幾耐咯 , 總之就好耐啦)   ^_^ !!

部機底部有漏油跡象 , 雖然對操作冇乜影響 , 

不過話晒都咁多年 , 始終都唔多放心 , 容乜易洗洗下衫大爆炸 , 

到時上A1頭條咪大鑊 , 最慘係隔離左右都多得你唔小 , 呢樣先係主因 .

於是乎四出咁搵心水機 , 睇左好多個牌子 , 對於有選擇困難症既我 , 

確實充滿難度 , 淨係在樂天搵酒店 , 搵到頭都爆左就已經知啦 .

本來睇中左 日立 既機款 , 可惜佢機身比較高 , 

洗衣機位上面有個煤氣乾衣機 , 若然部機太高就唔係咁方便 .

千揀萬揀之下 , 揀中呢部 Panasonic NA-F65G5 

在豐澤度買 $2592.00 , 買機時問佢 : 有冇夜晚送貨 ? 

送貨時會唔會收埋部舊機走 ? 包唔包安裝 ? 有冇保用 ? 

佢答 : 送貨只係得日間 , 可以收走舊機 , 

(相信佢收左都係賣俾D印巴佬 , 就當係伙記D下欄錢啦)

另外唔包安裝 , 只係放低部機就走 , 與及由代理提供兩年保用 .

既然冇夜晚送貨 , 唯有休息一日等收機 , 期間都唔係白過架 , 

要清晒門戶 , 地下積埋唔小萬年塵 , 清理起上黎仲辛苦過開工 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好 ~ 講完簡介輪到睇相 , 首先介紹一下舊機 : 愛妻號 

操作正常架 , 不過係漏油先至放棄佢 , 對佢充滿感情 . 


舊機操作相當簡單 , 呢樣亦係唔捨得既原因 .


就係呢度喇 , 漏油漏到黐立立咁 , 都唔知乜野黎 ? 

要用天拿水先至可以完全清理 .


好污糟既呢 , 呢度只係一部份 .


拎走部舊機 , 污糟到啊媽都唔認得 , 

要清理門戶實在係一件艱巨既任務 . 


一場火拼之後 , 係咪好乾淨呢 , 堅呀 . 


攪掂晒之後亦係貨到之時 , Panasonic NA-F65G5

(相片外圍經過處理 , 費時間屋嚇親人) haha ...


拆開個箱 , 見到部機既真身 . (相片又係經過處理)

箱裡面有一塊膠板及兩條膠喉 , 一粗一幼 , 膠板安裝在洗衣機底部 , 

裝又得 ~ 唔裝又得 , 反正都唔會經常反轉部機 .


將佢放落舊機位置 , Fit 晒 ~ 


輪到駁水喉 , 先將幼喉擰入水龍頭 .


另一邊駁落洗衣機度 .


攪掂就係咁樣喇 .


粗果條喉一邊駁落出水口 .


另一邊自然係駁落坑渠啦 .


千祈唔好忘記插電 .


面板睇落好多野Set , 其實好簡單 , 手板眼見功夫 .


洗衣糟部份 , 綠色 ~ 我鍾意 .  ^^


成個萬花筒咁款 , 好靚呀 . Yeah !!


用後心得 : 所謂江山代有人才出 , 一代新機勝舊機 .

新機洗衣洗衫時 , 無論出水至到洗衣時質感 , 確實遠勝舊機 , 

我最欣賞佢有倒數洗衣時間顯示 , 雖然唔算太實用 , 

(洗完佢都會BB聲提醒你) 不過就好過癮 .

$2592.00 貴就貴左D , 希望用到10年以上啦 .

Bye Bye !