2015/10/28

北海道自駕遊 ~ 停車場篇




Hello !


早日同Blog友講起酒店停車場 , 

覺得呢個話題都幾過癮 , 就即管攞黎講下 .  ^^

事緣係講起 東橫イン , 我話我未住過佢 , 

皆因最忌佢果個立体駐車場 , (呢個亦係我唔選擇入住東橫イン既理由)

聽講呢味停車場分兩種 , 有D有專人負責睇場 , 

另外果種就要食自己 , 前者都已經怕怕 , 後者更加咪攪 .

睇過唔小Blog友既泊 立体駐車場 經驗 , 就講我知果D啦 , 

如有錯漏 , 祈為指正 . 首先在外圍位置停車 , 卸下行李 , 

跟住摺埋兩邊倒後鏡 , 再向前駛 , 去到指定位置停車 , 然後個人出返黎 . 

當然要記得鎖車 . 最後佢會俾張泊車証你 , 咁就走得 .


講番我黎緊呢次行程 , 酒店大部份已經搵到 , 

遲D會在 2016行程初盤 裡逐間介紹 , 已經介紹左兩間 .

除左地點 ~ 房間 ~ 晚餐 ~ 溫泉 ~ 價錢之外 , 停車場都極之重要 ,

呢幾年黎都幫襯過唔小酒店 ~ 旅館 , 最理想既就係外面有露天停車場 , 

就算執漏野都可以出去攞番 , 好似下圖果間咁 .


最唔理想既就係要俾條車匙佢Keep住 , 

Check Out 時先至攞番 , 唔係信佢唔過 , 只不過條車匙唔在自己手中 , 

始終都有D忐忑不安 , 好似下圖呢間咁 .


跟住仲有幾間既停車場都好滿意 .  ^^


停車場就在旅館外面 , 我鍾意 .


呢類有蓋停車場都可以接受 .


夠鐘睇 天幕圍城 .

Bye Bye ! 


2015/10/25

2016 行程初盤 (第二日行程)




Hello !


上個禮拜講第一日既行程 , 隔左一個星期 , 

輪到第二日行程 , 每個星期講一日 , 講晒都仲未出發呀 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第二日食完早餐出發 , 如果上日冇去到襟裳岬 , 

咁第一個景點應該係 : 親子岩展望台 , 果度海中有三舊石 , 

一大一中一細 , 好似一家人咁 , 所以稱為親子石 , 幾好睇架 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後若然冇封路 , 順便過埋隔離既 : 観音山展望台 .

(二月份都仲係大雪天時 , 邊度封路都未知 , 著名景點好似 : 知床峠 , 

就知道封路啫 , 其他小型景點都係搏搏下 , 搵料都唔搵得咁多 .  =_= !! )

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再黎就係 : エンルム岬 ...

跟住就係 : 襟裳岬喇 , 之前講過風之館會休息 , 所以只係在附近睇風景 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

參觀完畢又係沿住海邊向釧路市進發 , 第一個景點就係 : 黃金道路 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

行多冇幾遠 , 就會見到 : フンベの滝 , 不過果度冇乜位停車 , 

一切都要睇下點先 , 隨機應變啦 .  

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後呢個 : 湧洞湖展望台 , 又係唔知會唔會封路 , 睇下點啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

本來下一個景點係 : 長節湖 , 之但係上次冇雪去到都冇野睇 , 

今次都係慳番D功夫 , Next !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

Next 就係 : 昆布刈石展望台 , 居高臨下欣賞個海岸 , 唔錯 !

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再黎就到達 道の駅 , 呢度又係一個景點 , 叫做 : 恋問海岸 , 

可以近距離睇海景 , 不過小心大浪 .  ^^

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再跟住去到釧路市 , 睇下幾多點啦 , 如果有時間 , 

可以去多個景點 , 不過果陣日短夜長 , 都唔好太過期望 .

當日既酒店已經揀好 , 仲Book埋添 , 就係上次住過既 :



上次住過覺得佢唔錯 , 我份人一向念舊 , 今次就幫襯返佢啦 .

第二日行程就係咁上下 .  

Bye Bye !

2015/10/21

超級巨熊




Hello !


今日頭條 : 北海道現400公斤巨熊 ...


今日係重陽節假期 , 襯得閒寫番篇網誌 , 

呢篇新聞係星期一晴報報導 , 內容自己慢慢睇 .

睇到呢單新聞第一個感覺係唏噓 ...  =_= ...  (唯有替佢默哀)

因為報導話農夫發現佢果陣 , 佢正在農田覓食 , 

正所謂 : 搵食啫 , 唔駛攞命掛 . (殺人就話另當別論)

仲有就係養到咁大隻既異獸 , 打死佢未免太過可惜 , 

如果可以招降 , 安置佢去 登別 或者 洞爺湖 熊牧場成為名星熊 , 

大家各得其所 , Win Win 雙贏 , 成事既話 , 黎緊既北海道之旅 , 

肯定會加入景點裡面 , 可惜事與願違 .  >_< !!

講開野生棕熊 , 一直以為淨係得 知床 果頭先至有 , 

繼早年 知床斜里殺熊事件 之後 , 都甚小聽到棕熊誤闖民居 ,

今次事發地點係 紋別 , 果度都唔算森林區 , 咁樣都有熊出沒 , 

仲要係超級巨熊 , 認真匪夷所思 .   

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

熊牧場呢類景點 , 其實我都幾鍾意參觀 , 以我所知 北海道 一共有四個 , 

分別係大家熟識既 登別 & 洞爺湖 , 同埋 佐幌熊山 , 

與及比較冷門既 大雪山ベアーセンター , 可惜後兩者歇冬 , 無緣一會 .

前兩者又去過幾次 , 今次都唔會將佢編入行程內 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外落小小既 秋田縣 , 本來都有兩個熊牧場 , 

一個係 秋田八幡平クマ牧場 , 可惜早年發生走熊殺人事件 , 

查封後至今仍未復業 , 隔離既 阿仁熊牧場 , 呢個曾經一遊 , 

裡面住既係黑熊 , 呢個場冇乜人氣 , 唔似得 洞爺湖 果個咁 , 

即使非假日都人頭湧湧 , 可以話係不去也罷 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

好喇 ~ 棕熊事件就講住咁多先 , 再搵到旅遊料即向大家匯報 .

Bye Bye !


2015/10/18

2016 行程初盤 (第一日行程)




Hello !


今日係星期日 , 話就話入左秋 , 天氣依然熱到癲 .

再加上曬爆 , 在房裡即使放埋冷氣 , 都有頂唔順之勢 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

在10月2日咪出左篇行程初盤既 , 暫時都諗唔到更好既方案 , 

相信都好大機會選用呢個行程 , 唔講大家唔知 , 

呢個行程可以一次過報兩個仇 , (或者再添新仇 , 一切睇天氣做人)

2012年果次霧駕遊尾段 , 有部份相片失落左 , 今次既行程 ,

正正係要填補番果次既遺憾 , 依家就講下預算路線 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

第一日由於係凌晨機 , 到達北海道時 , 大約A.M.10:00 , 

所以會在機場攞車 , 第一個目的地係好有淵緣既 : 道の駅 ウトナイ湖 .

所謂既淵緣 , 就係第一次 (2010年) 自駕遊時第一個景點 , 

同時亦係第一單蝦碌事件發生既地方 , 依家諗起都忍唔住笑左出黎 .

重遊舊地懷緬完之後 , 下一站就係 苫小牧 既北寄貝食堂

食完之後再出發 , 打後果D就沿住海邊進發 , 一直去到道の駅先至停落黎 .

呢個 道の駅 , 叫做 サラブレッドロード新冠 , 同馬 & 音樂有關 .

參觀完呢度 , 下一站又係 道の駅 , 叫做 みついし , 呢度亦係 三石海浜公園 ,

出面有個沙灘 , D浪好勁架 , 有時間一定要睇睇 .  ^^

之後果個景點 , 真係要睇時間做人 , 因為酒店就在附近 , 

如果有時間 , 可以直接去 襟裳岬 , 睇完再行回頭路往酒店 ,

時間唔夠既話 , 可以等翌日先至去 , 反正都係同一條路 , 

順便講埋 , 當日酒店亦都已經揀好 , 仲落實Book埋添 .

叫做 : うらかわ優駿ビレッジアエル , 呢間酒店以往都住過 , 唔錯架 .


第一日既行程就係咁上下 , 有時間再繼續講埋打後果D .

Bye Bye !


2015/10/15

遲早俾佢攪到冇得租




Hello ! 


今日頭條 : 內地人換港駕照 , 3年激增60% ...


呢單料係尋日 "晴報" 既新聞 , 睇落有DD切身關係 , 

所以攞黎講下 . 報導話現時持內地駕駛執照既內地人士 , 

可以免考試就換領香港駕駛執照 , 而有關申請數字3年內激增6成 . 

有關注駕駛安全團體估計 , 持香港駕駛執照到海外自駕遊

實在太過方便 , 所以吸引到內地人來港換領香港駕駛執照

作為跳板 , 以便去外國自駕遊 .  =_= !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

唔知大家仲記唔記得 , 在今年3月25日果篇網誌 , 

叫做 : 租定係唔租 ? 內容講 新札幌Toyota 唔再租車俾中國遊客 .

(結果証實原來只係唔租俾持中國護照既旅客)

正所謂上有政策 , 下有對策 , 聰明既內地人 , 又點會輸俾日本人 , 

佢地諗到黎香港免考試換領香港駕駛執照 , 再申請國際牌 , 

咁就同香港人平起平坐 , 可以去其他國家租車自駕遊 .

之但係凡事必有因 , 日本人唔會無端端唔再租車俾中國遊客 , 

真正既實情我唔知 , 不過相信好大程度係因為佢地既駕駛態度 , 

聽講在內地 , 寧願車死人 , 好過車傷人 , 可能日本人就係怕呢著 .

依家俾佢用香港黎做跳板 , 攞正牌咁在日本租車 , (其實唔知租唔租得到)

惡性循環之下 , 遲D可能連香港人都殃及池魚冇得再租 . 

如果真係既話 , 咁就真係唔得佢死咯 . 唉 ...

Bye Bye ! 


2015/10/11

魅力發現 ! 北海道展




Hello !


多得Blog友 友季姐 既推介 , (唔講真係唔知)

話星期六 & 日 , 荷里活廣場有個北海道旅遊展 . (特別鳴謝)

既然近近地 , 收工一於去睇睇 , 反正免費入場 .

呢度就係喇 , 星期六晚 ~ 現場唔算好多人 .


~ 入口 ~ 

(隻野究竟係鹿 ~ 熊 ~ 還是獅子 ? 好抽象)  XD


富良野蜜瓜 , 係贈品還是現場發售呢 ?


影齊未 ? 攪掂就一齊入去 .

入口櫃檯有問卷派發 , 填妥交回後 , 送攤位遊戲券兩張 .


就係右下角果兩張 , 釣水溜溜球 & 投環券 .


一家大細影相留念位 .


襯冇乜人 , 黎多張添 . 一有人就會磨爛蓆 , 有影襯手 .


北海道 , 四季皆宜 . (黎緊就係玩冬季)


先黎個春 ~ 夏 .


跟住當然係秋 ~ 冬 .


轉個身去後面 , 問題時間到 .


問題一 . (呢題我都唔識)


問題二 . (應該係流冰)


問題三 . (段估都唔會係 2 ~ 3 掛 ? 我買 1 )


問題四 . (呢題真係俾佢考起 , 棄權)


問題五 . (我賣2號)

五題問晒 , 真正答案我都唔知 , 無從稽考 .


轉過另一邊 , 咁多人排隊 , 一定係遊戲攤位 .


拎定張投環券出黎排隊 , 大顯身手 . haha ...


另一邊廂 , 縱環遊 & 東瀛遊 .

現場兜搭 , 果然識得做生意 . 


參觀完畢 , 攪掂地下呢Part , 上樓上居高臨下 .


成個會場一眼睇晒 , 星期日應該會多D人掛 ?


雖然我都有參加 , 不過對搵料幫助不大 . 


只係襯熱鬧支持一下 .   ^_^ !!


呢個就係釣水溜溜球 .


始終都係投環吸引D , 睇排隊人數就知 .

兩位小姐準備好未 , Are you ready ?


第一位姐姐 , 中呀 .


第二位戴眼鏡姐姐 , 又中 , 勁喎 . 


仲有旅遊天書展銷 , 會場價 $50.00 


都有D人買架 , 不過我冇買 , 唔駛啦 , 一切在心中 .


其他宣傳品就拎左幾張 .


就係呢幾張 , 得閒可以睇睇佢 .


攪掂返屋企開餐 , 同場加映尋晚晚餐 ...


即係上篇既阿信屋甘蝦 , 再在百佳買幾片三文魚刺身 , 

加個韓國辛辣麵 , 當然唔小得 Asahi 啤酒啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

甘蝦食評篇 , 蝦既味道就OK , 價錢平均一蚊隻亦都OK .

唯一要彈既就係D蝦細隻左D , 同埋比較黐殼 , 

其他都非常之滿意 , 呢餐掂呀 .  ^^

Bye Bye ! 


2015/10/07

格陵蘭北極甜蝦刺身300g




Hello !


今晚經過 阿信屋 , 見到有D好野 , 

乜都唔駛講 , 即刻整番盒 , 係乜東東咁吸引呢 ?

之唔係佢囉 , 收據寫住 : 阿信屋格陵蘭北極甜蝦刺身300g .

甘えび , 好吸引既呢 .  ^_^ !!


打開個包裝盒 , 雪到硬掘掘 , 食之前要解凍 .


數個數量 , 大大小小一共33隻 .


價錢方面一D都唔貴 , 門口價 $49.80

會員七折優惠 , 折實 $34.90 , 平均一隻都係1蚊多DD .

至於味道 ? 未食呀 ~ 等星期六再搭D刺身一齊上 .

配埋 wasabi , 應該會好正 , 介紹住咁多先 , 

夠鐘睇 天幕圍城 . 

Bye Bye !


2015/10/05

買齊機票喇




Hello !


經過多日黎既苦戰 , (所謂苦戰 , 即係腦交戰)

終於將上篇既路程落實 , 既然落實左 , 咁就買埋回程既機票 .

今次回程果兩程機 , 都係幫襯 Peach , 因為價錢比較平 .

一齊上去 Peach 網頁度訂位咯 .  ^_^ !!

先揀單程 ~ 之後係出發地 ~ 目的地 ~ 去程日期 ~ 

與及回程日期 ~ 成人1張 ~ 最後按搜尋 .


出左個日期 & 價位 , 啱就按確認 . 

(以下日期路線只供參考 , 並非我既回程日期)


之後輸入詳細姓名及其他資料 .


下一頁係揀坐位 , 仲有大把位你揀 .


就揀 14D , 之前唔知有冇講過 , 我至鍾意通道位 , 

出入方便之餘 , 去洗手間都唔駛過五關斬六將 . haha ...


揀好之後 , 最後就係信用咭俾錢 , 

如果用 VISA 既話 , 要俾多 330 Yen 手續費 .


輸入埋之後 , 攪掂晒架喇 , 只要印番張訂位A4紙就OK .

就係咁樣 , 四程機都買齊晒 , 之後仲有大把野做 , 

就好似搵酒店 ~ Book車 ~ 差唔多時間申請國際牌 , 

兌換日圓 (呢樣已經攪掂) , 當然要搵埋更詳細既景點資料 , 

大致上係咁多 , 淨係以上果幾味都有排玩 .

~ 夠鐘睇張保仔 ~ 

Bye Bye !