2014/01/28

因幡之白兔




Hello !


仲有三幾日就係農曆新年 , 呢篇相信都係歲晚收爐篇 .

(因為今明兩晚都有 "英超聯賽" , 淨係錄影都有排睇)  ^^

首先同大家拜個早年 , 祝大家花開富貴 , 如意吉祥 , 

龍馬精神 , 橫財就手 , 出入平安 , 恭喜 !!

~~~~~~~~~~~~~~~~~~~~~~~~~~~~~~~~~~~~~~~~~~~

好 ~ 輪到講主題 , 今次既主題叫做 : 因幡之白兔 .

咁乜野叫做 "因幡之白兔" 呢 ? 我都係呢幾日內先聽過 , 

皆因早幾日睇日劇 "Doctor X" , 劇裡面有講及 , 

於是上網搵料 , 睇下佢係乜東東 . 

原來係一個日本既童話故事 , 傳到現代亦有警世作用 .

內容係講有隻白兔想過對面岸 , 但係相距實在太遠 ,

於是白兔問鯊魚 , 問誰的親戚比較多 ? 鯊魚話梗係我地多D ,

於是Call齊一眾親朋戚友一字排開 .

白兔亦老實不客氣 , 踩住佢地過對面岸 , 差唔多埋岸時 ,

一時得意忘形 , 踢爆自己既詭計 , 鯊魚們老羞成怒 ,

咬到隻白兔啊媽都唔認得 , 後來白兔又被眾神整蠱 ,

教佢錯既療傷方法 , 結果痛上加痛 .

最後 "大穴牟遲神" 傳授佢正確療傷方法 , 咁先救番小命一條 .

~~~~~~~~~~~~~~~~~~~~~~~~~~~~~~~~~~~~~~~~~~~~~

呢個故事教訓我地 , 要呃人既話就要呃一世 , 千祈咪鬼拍後尾枕 .

至於案發現場 , 就在 "日本" 既鳥取縣鳥取市附近 .

有晒石像及典故 .


講開 "鳥取" 呢個地方 , 其實我都想去 , 果度既 "境港市" , 

係 "鬼太郎" 既故鄉 , 附近既街道 , 都會見到佢既蹤影 .

不過今年既配額俾左 "北海道" , 所以遲D先諗佢 .

最後 ~ 在 Youtube 搵到條短片 , 好攪鬼架 , 有時間可以一睇 .


Bye Bye ! 

馬年再見 .

2014/01/06

一年容易又日本一




Hello !


今日頭條 : 日本一身價暴跌九成半 ...


一年容易 , 今年既日本一又黎過 , 由於冇 "板前壽司"

鄭威濤參與競投 , 唔駛炒到貴一貴 , 所以價位暴跌九成半 , 

以736萬日圓成交 , 而成功投標者 , 亦係上年既奪標者 .

就係喜代村集團社長 "木村清" , 恭喜晒 !!

講開呢位社長 , 上次去 "大間" 果頭 , 亦都曾經見過佢一面 , 

不過就係電視上面 , 節目講佢誓要投到日本一 , 

結果出了史上最高價 1億5千萬Yen , 

今年又投到 , 不過就慳番一大截 , 認真抵玩 .  ^^


而果條日本一 , 重230公斤 , 從 "青森縣" 大間港捕獲 , 

"大間" 果度確係吞拿魚既福地 , "吞拿 vs 鐵拳" 果然名不虛傳 .

其實日本一既情況 , 同 "香港" 有D相似 , 相信好多 "日本人" , 

都唔妥 "香港人" 炒貴晒D吞拿魚 , 而我地 "香港人" , 就唔妥

"大陸人" 黎 "香港" 乜都炒貴晒 , 我諗 : 如果D "大陸人" 走晒 , 

相信 "香港" 乜鬼野價格都會大幅回落 , 希望有呢一日啦 . 

Bye Bye !

2014/01/04

127小時 & 越空仁醫




Hello !


今晚冇 "英超聯" 賽事 , 剩番D盃仔賽 , 不如寫番篇網誌好過 . 

寫乜野主題呢 ? 就寫近排睇完及睇緊既兩套劇啦 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

首先第一套係電影 "127小時" , 呢套電影上映已經多時 . 


在 "有線" HMC台亦都做左好耐 , 一直收錄在我既硬碟錄影機裡面 , 

近日終於的起心肝睇埋佢 , 雖然已經知道晒劇情既來龍去脈 , 

不過睇起上黎依然緊張 , 亦都戥佢心寒 .  =_= !!

以前聽人講睇完 "大白鯊" 唔敢去海灘游水 , 

咁睇完 "127小時" , 可能唔敢一個人去旅行 .  >_< !!

而我就至鍾意一個人去旅行 , 仲係鍾意捐窿捐罅果隻 , 

大吉利是起上黎好似主角咁 , 真係邊度都唔駛去 . haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

另外介紹呢套 , 叫做 "越空仁醫" , 即係 "韓版" 仁醫 .


究竟 "韓國" 方面有冇俾版費 "日本" ? 咁就不得而知 .

不過段估都唔會好似 TVB 咁無恥 , 明抄人地套 "神探伽俐略" .

講番呢套劇 , 逢星期日P.M.11:00在高清台播兩集 , 已經做左一半 .

依家逢星期1-5都同屋企人一齊煲 , 錄起黎慢慢睇 .  ^^

雖然同 "日版" 一樣 , 講個醫生返回古代同歷史人物醫病及做手術 .

(我始終認為唔多Work , 因為在現代做手術 , 即使設備齊全 , 

亦都唔係十拿九穩 , 隨時細菌感染 , 不過聽古就唔好駁古咁話啦) 

但係劇情方面就略有出入 , 我個人認為 "韓版" 比較好睇 .

除了衣著及人物靚D之外 , 劇情編排亦優勝D .

所以未等 TVB 高清台播放完 , 我已經上內地網睇晒成套劇 . 

如果有時間既話 , 大家都可以一睇 , 冇介紹錯架 . 

Bye Bye !

2014/01/01

2014 新年新願望




Hello !


今次係2014年首篇網誌 , 講D乜野好呢 ?

開Blog時(即係依家都未諗到) , 諗住乜都搵D野黎寫下啦 . 

~~~~~~~~~~~~~~~~~~~~~~~~~~~~~~~~~~~~~~~~~~~~

既然冇特定主題 , 不如講足球 , 唔覺唔覺 ,  

 "英超" 已經打了半季 , 仲有四個多月就埋尾 , 

睇番呢刻既排名榜 , 排榜首竟然係 "阿仙奴" , 真係有D估佢唔到 .

呢隊波開季第一場就輸俾 "維拉" , 諗住佢都冇乜料到 , 

點知打後越戰越勇 , 早幾場連 "車仔" 都咬佢唔入 , 認真唔講得笑 .

之後輪到排第2位 "曼城" , 季初換新領隊之後 , 表現都唔差架 , 

尤其係主場 , 逢打必贏 , 唔知遲下 "車仔" 作客對佢地會點呢 ?

排第3位係 "車仔" , 今季 "摩連奴" 重新領軍 , 都有些小期望架 , 

可惜打落黎都係不外如是 , 雖然同榜首只係差兩分 , 

不過完全俾唔到人有霸氣既感覺 , 反而佢既手下敗將 "利物浦" , 

"阿蘇" 拍上 "史度歷治" 更加可以話俾人知 , 乜野先叫做前鋒 . 

之後既 4 ~ 5 ~ 6 ~ 7 位 , 全部都咬得好緊 , 正式係一分都不能失 .

最後講 "曼聯" , 費Sir 退休換上 "莫耶斯" , 開季認真唔掂檔 , 

不過慢慢都打番上黎 , 我諗到季尾 , 歐聯應該都可以佔到一席 .

~~~~~~~~~~~~~~~~~~~~~~~~~~~~~~~~~~~~~~~~~~~~

至於新年新願望 , 當然係希望 "車仔" 可以再一次奪 "歐聯" 冠軍 , 

再加埋聯賽冠軍 , 黎個雙冠王 , (其他盃仔留番俾人)

咁就於願足矣 , 另外仲有季後大旅行 , 玩得開開心心 , 

事事順利 , 不過依家我都仲未積極咁搵料 , 

過多一排啦 , 農曆年左右先執執個行程 ,

家陣四圍睇睇好乜心水 .  ^^

Bye Bye !