2015/02/19

羊年歡樂 , 歡樂羊年




Hello !


今日大年初一 , 正式係由朝忙到晚 .  ^_^ !!

作為晚輩既我 , 晨咁早就要四出拜年 , 一直磨到依家先至叫做喘定 .

食完晚飯既節目就係安坐家中睇花車巡遊 , 可謂年年如是 .

寫埋呢篇網誌之後 , 跟手仲要上各界Blog友度拜年 .

首先祝各位龍馬精神 , 如意吉祥 , 花開富貴 , 讀書既就學業進步 , 

做生意或者打工既就今年搵多D , 最緊要就開開心心 , 萬事勝意 .

最後係拎D野出黎招呼大家 , 小小意思 , 唔成敬意 .


拆喇喂 ~ 先食為敬 . haha ...

夠唔夠呀 ? 唔夠仲有 金莎 & 藍罐 , 招呼唔到 .  ^^


仲有野飲招呼大家 , 啱啱買都未雪凍 , 雪櫃有啤酒 , OK嘛 ?


夠鐘睇花車 , 係咁先 .

Bye Bye !

2015/02/18

團年快樂




Hello !


今日係年三十 , 頭先食過團年飯 , 跟手睇電視 ...

襯住馬年年尾 , 整番篇最後一擊 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

咁講乜野主題呢 ? 就講最令人關心既日本 .

如果有留意新聞 , 應該知道 岩手縣 附近發生地震 , 仲發出海嘯警報 .

好彩只係虛驚一場 , 並無海嘯發生 . 

另一邊既 十勝火山 , 又發現有小小活動跡象 , 都咪話唔得人驚 .

希望最終冇事發生啦 , 平安是福嘛 . 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

講開日本 , 由於有新既航空公司 , 行程方面又添變數 , 

之前實牙實齒既Plan C , 可能又要轉一轉 , 好彩之前既行程篇 , 

只有開始左小小 , 如果寫好晒又改到七彩 , 咁就唔係幾好啦 .  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

襯呢幾日假期 , 用拜年之後既僅餘時間 , 再執好個行程 , 

有時間再向外公佈 , 就黎踏入羊年 , 講住咁多先 .

聽日再同大家拜年 .  ^^

Bye Bye !

2015/02/15

有冇人幫襯過Jetstar ?




Hello ! 


唔覺唔覺 , 今日已經係年廿七 , 

相信好多Blog友(公司)已經歲晚收爐 .我就要捱多兩日 , 

即係年三十先開始放假 , 初八啟市 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

咁今日講乜野主題呢 ? 依然係講旅遊 , 不過就唔係景點 , 而係航空公司 .

早日(2月12日)睇報紙 , 介紹呢間航空公司 , 話有特價機票 , $66 飛大阪 .


好坦白講 , 超特價機票呢家野 , Blog友 コーさん 都介紹唔小 , 

不過 ~ 邊度夠果D專業搶票手快丫 , 所以都不以為然 .  =_= !!

過幾日後(2月14日)又睇到佢既報導 .


於是上佢網頁睇睇 , 發現佢地有由 大阪 上 新千歲 既機票喎 , 

時間亦都唔錯 , 價錢比幫襯開既 ANA 套餐仲要平一截 , 

價錢都唔係最重點 , 重點係去果程有凌晨機 , 之前講過好多次 , 

凌晨機感覺上著數左一日 , 抵玩好多 .  ^_^ !!

我只係試過一次就取消左 , 依家搵到呢一間 , 希望又一次重燃 .

再跟住睇報紙 , 見到佢既新聞 , 好似話發牌方面有D問題

咁即係點呀 ? 如果幫襯左佢地Book機票 , 跟住唔發牌 , 係咪唔算數 ?

另一方面 , 想請教各位Blog友 , 有冇人幫襯過呢間 捷星 ?

D機得唔得呢 ? 會唔會好殘 ? 服務方面又如何呢 ? 又會唔會延誤當食生菜呢 ?

(呢度講 ~ 呢度散 , 聽講 香港航空 既班次經常延誤 , 印象比較負面)

 計過條數 , 如果幫襯 捷星 , 有得揀位唔包寄艙行李果個Plan , 

同 ANA 比較 , 可以慳到大約 $2000 .

二仟蚊港幣喎 , 假設拉麵1000Yen一碗 , 0.065計算 ,

足足可以食到30碗 , 都咪話唔小呀 .  XD

本來 ANA 都好理想 , 不過冇凌晨機 , 所以先想 蟬過別枝 ,

 依家搜集多D資料再睇下點先 .

Bye Bye !

2015/02/09

Made in Japan




Hello !


好耐冇寫過專題報導 , 今晚過一過手癮先 .  ^_^ !!

今日頭條 : 內地客赴日掃貨 , 瘋搶馬桶座 .


報導話內地近來掀起赴日掃貨熱潮 , 在 秋葉原 既電器街 , 

一早就泊住十多輛旅遊巴 , 等待瘋狂掃貨既內地遊客 , 

掃貨內容有 : 電飯煲 ~ 馬桶座 ~ 保溫杯等等日產家居用品 . 

佢地覺得只要係日本產品 , 質素就會正D , 呢樣我都聽過 , 

就好似日本製造既 出前一丁 , 味道都好似好D . (或者係心理作用)

講開 秋葉原 , 自從2008年果次東京之旅後 , 都未嘗一遊 , 真係有D懷念 .

而廁所板呢樣野 , 我都有諗過買番一套 , 不過有好多技術細節諗唔掂 , 

所以打消念頭 , 仲有就係掛牆鐘 , (呢樣講過好幾次) 有D寫住電波放送 .

原來只限於日本境內使用 , 一旦出境就無用武之地 .  =_= !!

最後就係 秋葉原 呢度地方咁大 , 應該食得落所有內地客掛 ?

唔會發生日前屯門果單野 , 攪到要 光復屯門 . 

Bye Bye !

2015/02/08

閒聊幾句




Hello !


仲有一個星期多小小就係農曆新年 , 首先同大家拜個早年 .

祝大家花開富貴 , 如意吉祥 , 身體健康 , 大吉大利 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

旅遊搵料方面 , 暫時都無心戀戰 , 淨係睇上果篇 (黃金道路) 寫到爛尾就知 .

相信要到農曆年假果幾日 , 先至可以的起心肝做野 ,  

畢竟都仲有3個多月 , 正式係 : 不要急 ~ 不要急 ~ 反正有空 ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

咁今晚講D乜呢 ? 就講早日有單新聞 , 內容係 意大利 有個警察透過社交網站 ,

招待旅客留宿節省旅費 , 但世事又邊度有咁著數 , 晚上趁機落藥將旅客迷姦 .

太詳細就唔講咯 , 自己上網搜集啦 , 或者Click入呢個網站 .


在受害人裡面 , 包括有來自香港的女子 .  =_= !!

外國人就唔知 , 香港女性一向俾人感覺精甩尾 , 點解會咁失策 ?

三九唔識七去人地屋企訓 , 真係咁冇戒心 ? 我就一定接受唔到 .

一晚酒店都唔係太多錢唶 , 有D錢真係唔係唔慳得架 .

希望經過今次踢爆 , 令到有心想慳住宿費既旅客 , 

知道呢個世界真係有衰人 , 仲係好多果隻 .  >_< !!

Bye Bye !







2015/02/05

凍到啊媽都唔認得




Hello !


今日睇報紙既國際新聞版 , 其中一段話 北海道 受到冷空氣吹襲 , 

部份地區溫度跌至零下30度 , 包括有大家熟識既 旭川市 , 

同埋唔係咁熟識既 幌加內町 . 

Wow ~ 零下30度喎 ... 依家香港十零度 , 都尚且陰寒陰凍 , 

-30度實在難以想像 ? 等閒既裝備根本難以抵擋 , 

甚至汽車既電油都結冰都唔出奇 , 簡直係瘋狂 .  =_= !!

仲有 ~ 幌加內町 在那方 ? Check 過 Google 地圖 , 原來就在 羽幌町 隔離 .

平時一諗起 北海道 最凍 , 一定先諗起 稚內 , 

今次竟然俾佢對落既地方超前 , 真係估佢唔到 . 

另外受到惡劣天氣影響 , 新千歲機場班次或多或小都有延誤 .

如果冇記錯 , 札幌雪祭將會在日內開始 , 唔知依家點環境呢 ?

如果有Blog友即將出發北海道既話 , 祝佢好運啦 !!

Bye Bye !

P.S. : Check 過 Yahoo知識 , 話一般情況電油都唔係咁易到冰點 .

不過就冇講實幾多度以下先會結冰 .

2015/02/01

2015 預算路程B




Hello !


話都冇咁快又到禮拜日 , 上回講到第二日攞左車之後 , 

直去 襟裳岬 , 在果度住一晚 , 翌日起程 , 目的地係 釧路市 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

途中都有好幾個景點非停不可 , 首先係 : 黃金道路 .

老規矩 ~ 相片在網上班番黎 .  


跟住就係 フンベの滝 , 果度其實好濕碎 , 不過順便停車有照 .

寫到呢度 , 本來仲有野寫 , 因為夠鐘睇足球暫停 , 

今晚寫住咁多先 , 有時間再補寫 .  XD

Bye Bye !