2017/01/30

2017北海道及和歌山自駕遊~報平安篇A




Hello :


今日完成了稚內行程 , 依家在旅館休息中 .

尋晚冇 wifi 所以冇得寫 , 北海道天氣OK .

冇乜大雪之餘亦唔算好凍 .

講住咁多先 .

P.S. : Mark X 好打得 , 好好飛 .   ^_^

Bye Bye !



2017/01/27

(預先)暫別出發篇




Hello !


睇番上篇個日期 , 係一月十六日 , 

實在太耐冇更新過呢度咯 , 經過多日黎既火拼 , 

終於攪掂晒所有行程路線及景點 , 一直都以為只係在 和歌山兜個圈 , 

景點有限就懶懶行 , 原來果度都好多野睇 , 特別係 三重縣 鳥羽果頭 , 

地方大到呢 ... 今次只係去到佢既皮毛 , 如果真係要玩晒佢 , 

相信留多個星期都未得 , 所以只係mark低幾個必去景點 , 

好似 : 鳥羽水族館 ~ 夫婦岩等等 ... 

所有行程都寫晒落個File裡面 , 簡簡單單咋 .


再帶多本天書去 , 咁就實冇衰 .  ^^


另外早幾日睇新聞 , 話 鳥取 果頭有大雪 , 塞車塞到嚇死人 , 

呢幾日又好似好D , 真係有D擔心 , 希望順利啦 , 一切都睇天做人 .

寫完呢篇聽日就出發 , 聽日年初一 , 相信都冇乜時間寫野 , 

呢篇就當做預早暫別篇啦 , 返到黎先至寫餐飽 .

Bye Bye !



2017/01/16

(暫時)休業啟示




Hello !


仲有唔夠兩個星期就出發 , 近日新聞話 北海道 方面又有暴雪 , 

都咪唔唔擔心 , 萬一好似聖誕果單野咁 , 真係邊度都唔駛去咯 .

不過有樣野更加值得擔心 , 就係搵料果方面 , 呢排掛住煲劇及其他 , 

搵料既野拖得就拖 , 家陣就快打到黎 , 正式係臨急先黎抱佛腳 , 

所以寫完呢篇之後 , 相信都要出門果陣先至可以再寫 , 

到時寫既將會係 出發篇 同埋 報平安篇 , 當然 ~ 返到黎之後 ,

個遊記點都唔會走你既 , 一定會好似以前咁 , 寫足佢半年左右 , 

(聽過民意調查 , 大家都希望睇詳細篇 , 一於就有咁詳得咁詳啦)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

經過尋日一整日既努力 , 大部份 北海道 既行程景點經已辦妥 , 

還記得以前會寫定去邊度邊度既 景點篇 , 今次就慳得就慳 , 

皆因 北海道 佔今次行程唔多之餘 , 部份景點都係重覆 , 

而 和歌山 果邊我係門外漢 , 好多景點都有賴大家幫手 , 

可能有好多變數 , 所以都唔敢寫包單去到邊度 , 

都係等返到黎至可以作實 , 好啦 ~ 暫時休業篇就寫到呢度 , 

希望 北海道 就算有雪 , 都唔好咁離譜啦 .

Bye Bye !



2017/01/07

一年容易又日本一 (2017)




Hello !


睇排忙於煲劇 , 冷落左呢度 , 今日有呢個主題 , 一於寫番篇 .

主題就係 日本一 , 一如上年 , 今次成功奪標者 , 

正正係呢幾年都中標既 喜代村集團社長 ~ 木村清 .


而今年既競投價一D都唔平 , 要成 7420萬日元 , 大約500萬港元 .

不過呢D噱頭野 , 當做宣傳 , 相信佢地都唔多志在 .  ^_^ !!

講起 日本一 呢個主題 , 不外乎都係講 早幾年 Rickyさん

攪寸個Party , 炒到條魚變天價 , 不過近年唔知佢有冇參與競投 , 

好似好耐冇聽過佢個名 , 另外就有樣不得不提 , 就係當年去 大間 , 

幫襯果間 吞拿魚丼 舖頭 , 大拖羅沽清 , 之後再冇機會幫襯佢 , 

一直引以為憾 , 黎緊農曆年去 和歌山 果邊 , 唔知有冇呢味野呢 ?

搵料方面仍然在進行中 , 唔通真係要臨出門先至搵得齊 ?  >_< !! 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

襯有時間講多小小 , 近排煲緊果套叫做 鬼怪 既韓劇 , 

暫時睇左5集 , 呢套劇提材都幾新穎 , 亦都幾凄美 , 

唔知邊位編劇既手筆呢 ? 總係覺得帶有些小 來自星星的你 既味道 . 

(主角有超能力 & 大把錢 & 經常與女角吵架 及 女角有危難時出手相助 ... )

好話唔好聽 , 呢套電視劇 , 無論故事 ~ 選角 ~ 配樂 ~ 主題曲 , 

(唯獨係女角個樣差左DD)

香港既電視劇真係望塵莫及 , 果D 流氓皇帝 ~ 巾幗梟雄 ...

你睇埋我果份咯 , 就算係新劇 味想天開 , 都係興趣不大 , 

反而明珠台既美劇 , 幾近套套都有睇 , 好似 箭神 ~ 賈神探 ~

血變 (直情係正啦) , 黎緊新一季 閃電俠 ~ 女超人 ~ 魔鬼神探 , 

都係非睇不可 , 咁樣落去真係唔掂喎 , 

唔知幾時先至可以攪番起港劇呢 ? 

Bye Bye !