2014北海道11天自駕遊D3-8函館大沼プリンスホテル篇

(因為記憶咭遺失左 , 所以暫時冇相睇 , 遲D會接續番)

Hello !

上回講到在高速公路飛馳 , 之後到達 "森" 呢個出口 ,

在 ETC 閘口結算後 , 來到普通公路繼續行程 ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住一直行 , 直到 大沼駅 先至停低 , 根據資料 , 

大沼呢度既景點 , 分別在 大沼駅 及 大沼公園駅 呢兩度 , 當中以後者為首 .

參觀過 大沼駅 後 , 連隨過 大沼公園駅 , 兩者只係幾分鐘車程 .

到達 大沼公園駅 , 部車要停泊在旅遊中心 , 因為果度有免費泊車 .

(資料由 t 先生提供 , 特別嗚謝) 入到旅遊中心 , 乜野資料都拎番份 .

跟手問佢觀光船在邊度上船 ? 收費及班次又如何 ? 

佢拎份資料俾過我 , 話觀光船收費 1100Yen , 在另一邊上船 , 

不過尾班船已經開出 , 明天請早 . 最後俾左張優惠券我 , 

可以慳100Yen . (觀光船班次見圖)

原來行行重行行 , 當時已經係 16:30 , 17:00果班船係7-8月先至有 .

其實都唔係咁重要 , 因為當時天色昏暗 , 加上毛毛細雨 , 

絕非遊沼既好時機 , 唯有在附近探一探路 , 等待明日一擊即中 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

探完路之後 , 就去下一站 , 呢一站正係 山川牧場 , 輸入 GPS , 

就在 大沼駅 附近 , 又兜番過去 , 搵左一陣都唔見既 ? 原來去左佢後面 ,

唔怪得啦 . 去番佢正門 (由大馬路轉入去)終於搵到 ,

原來只係一個賣牛奶既地方 , 一場黎到 , 幾大都整番支喇 , 盛惠100Yen .

味道果然唔錯 . (我覺得樽裝牛奶好飲過紙盒裝)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

飲過牛奶後 , 再四圍行下 , 其實經過連場行車 , 已經攪到好晏 ,

係時候往酒店Check in , 不過仲有餐晚要解決 , 因為套餐唔包 .

出發前 Blog友 コーさん提供好多餐廳資料 , 又要特此嗚謝 .

本來想幫襯一間叫做 キッチン さわで夢屋 既餐廳 , 

之但係飲完牛奶無耐唔算太肚餓 , 呢個都唔係重點 , 

而係果度一到黃昏時份 , 簡直係變左死鎮無異 , 望過入間餐廳 , 

裡面連小貓三幾隻都冇 , 所以都係唔幫襯咯 , 免得你眼望我眼 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

既然係咁就去7仔度求其買D野當晚餐 , 在酒店房度攪掂 .

大沼駅 附近就有間7仔 , 買罐啤酒&杯麵 , 加多個沙律就OK , 

直接往酒店Check in , 酒店距離呢度好近咋 , 一陣就到 .

今晚酒店叫做 : 函館大沼プリンスホテル

講開呢間酒店就真係唔好提 , 房間基本上OK , 唔掂係講溫泉 , 

睇相好似好勁咁 , 實際上地方淺窄 , 多幾個人都充滿擠迫感 .

所以係咁咦浸一陣就算 , 浸完返房睇多陣電視就休息 .

第三日完 .

Bye Bye !