2014北海道11天自駕遊D5-5天然温泉やすらぎの湯 北のたまゆら桑園篇

(因為記憶咭遺失左 , 所以暫時冇相睇 , 遲D會接續番)

Hello !

上回講到本來想去兩個公園 , 不過攪晏左所以唔去 , 

呢著都算明智之舉 , 皆因之後果個景點 , 可以話係今程既重中之重 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

依家首要任務係返回 "札幌" , 經過一輪高速公路火拼 , 

終於到達酒店附近 , 不過泊車方面有個難提 , 呢間酒店地庫個停車場 , 

只係擺得幾部車 , 話咁快就爆滿 , 而地面大堂前車位 , 更加係小中有小 .

去到佢大堂擺車位 , 見到有張告示 , 話部車可以泊在附近多層停車場 .

於是過去睇睇 , 原來係 Times 租車公司樓上既 Car park , 

咁就點擺都得啦 , 順便講埋 , 今晚酒店係套餐第二晚既 Century Royal Hotel

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

花左都唔小時間先攪掂泊車呢Part , 跟住Check in 拎行李上房 , 

即刻就要出發 , 目的地係一站之遙既 "桑園" , 

去到JR站買飛入閘 , 札幌不愧為大站 , 90幾條線路 , 一時之間都唔知邊個月台上車 ?

唯有問下票務員啦 , 話時話 ~ 除左出機場 , 真係冇乜幾可搭JR .

話咁快就到站 , 出閘後又有問題 , 當日臨急臨忙出黎 , 

都冇帶齊資料 , 一時之間都搵唔到 天然温泉やすらぎの湯 北のたまゆら桑園 ?

好彩附近街道有地圖 , 否則真係有排搵 . (當時又落緊微雨)

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

搵到之後行入去 , 門口除鞋放Locker , 跟手在櫃台隔離買飛 , 

原來唔記得帶毛巾 , 咁就順手買埋 .

(入場費420Yen , 毛巾550Yen)

仲有回數券一張 , 十送一 .

(假設一年去一次 , 要第十一年先至可以用得到)  XD

之前唔知有冇講過 , 呢類 "錢湯" 我好鍾意架 , 可謂充滿人氣 . 

酒店附設既溫泉 , 我都浸過唔小 , 之但係好似呢度咁熱鬧 , 

真係好小有 , 加上氣氛好好 , 果然冇黎錯 , 我隆重向大家推介呢度 .

一時玩乾蒸 , 一時玩凍水 , 一時玩熱水 , 一時玩露天 , 

今次都算過足癮 , 簡直正到暈呀 , haha ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

仲未暈得住 , 浸完出黎休息室先至係戲肉 , 果個休息室地方有番咁上下 , 

遠處有部大電視 , 仲有好多張檯要黎開餐 , 好耐冇試過有D咁舒服既地方 , 

雖然左右隔離都有人 , 不過佢地傾偈唔會大聲 , 唔會吸煙 (吸煙區在另一邊)

有D大覺訓 , 有D坐姿豪邁 , 總之就夠晒Free咁啦 .

休息過後又到晚餐時間 , 話時話 ~ 中午食過海膽丼套餐之後都未有野落肚 ,

於是過隔離買飛 , 天婦羅套餐660Yen , 又飯又烏冬 , 認真抵食夾大件 .

仲有杯啤酒 , 450Yen , 浸完溫泉飲啤酒零舍好飲 , 

引用日劇 "無價人生" 既對白 , 啤酒係全宇宙最好飲 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

食完休息完都要打道回府 , 一個站之後就返回札幌 , 

呢個溫泉我會記住佢 , 他日重臨札幌一定再會一會佢 . Yeah !!

返到酒店睇多陣電視都要訓覺 , 今日行左好多路 , 

聽日旭山動物園再見 .

Bye Bye !