2014北海道11天自駕遊D5-2積丹岬篇

(因為記憶咭遺失左 , 所以暫時冇相睇 , 遲D會接續番)

Hello !

上回講到到達積丹 "神威岬" 底參觀 , 今次屬於淺層參觀 , 

皆因上年已經黎過及影左好多相 , 去到見到木欄有開 , 叫做冇乜風咁啦 .

完成任務之後就走得 . 落到下面 , 去番上年食 "海膽丼" 果間舖頭 , 

果度一邊係食堂 , 一邊係商店 , 去商店果邊 , 買左張 "神威岬到達証明書" .

雖然買左都係放櫃裡面 , 不過都想買張黎留念 , 盛惠150Yen .

14-05-26  11:08  (有幾款俾你揀 , 不過呢款大路D , 我比較鍾意)

買完之後又到午餐既時候 , 今次鎖定好在附近既 "中村屋" .

幾分鐘車程就到 , 可能唔係海膽當造季節 , 加上時間尚早 , 裡面只係得小貓三幾隻 ,

睇睇個餐牌 , 果D一日限定十碗既丼 , 尚未公開發售 , 只得D中等貨色 , 

唔緊要啦 , 求其叫個海膽丼定食 , 即係一碗飯加一碗湯 , 再配小小漬物 , 

當然仲有杯茶啦 , 盛惠2550Yen , 雖然係中等貨色 , 不過味道並唔失禮 , 

好過上年 (即係頭先買証明書果間好多)  XD

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

食完飯即刻就要趕下場 , 不過都係附近既地方 .

第一個係 : 島武意海岸 .

第二個係 : 出岬燈台 .

第三個係 : 積丹岬 .

擺好部車仲有排行 , 第一個 "島武意海岸" 屬於舊地重遊 , 所以唔落去下面 .

第二個 & 第三個都係同一條路上 , 就係相中既最右手邊斜路 .

行一輪大斜路 , 終於見到 "出岬燈台" , 老規矩影餐飽過佢 .

不過中途有段小插曲 , 影完相之後 , 放低相機及背囊 , 拎支水出黎飲 , 

攤抖過後諗住出發另一邊既 "積丹岬" , 行左十步左右 , 發現一隻手空空 , 

咦 ~ 相機呢 ? 原來只係放番支水入背囊就背上 , 一手拎行山拐杖就行 , 

好彩相機駛用率極高 , 所以好快就發現 , 否則整篇網誌都要用文字版交待 .

(可惜避得初一 , 避唔到十五 , 下一日都要漏低張記憶咭)  >_< !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

攪掂 "出岬燈台" 之後 , 過另一邊 "積丹岬" , 未到之前 , 對果度寄望甚殷 , 

點知又一次失望而回 , 向住 "積丹岬" 方向行 , 條路好長 , 行極都唔完 , 

行到差唔多果陣 , 見到有間類似發射塔 , 泊住幾部工程車 , 

工人在車裡開冷氣休息 , (引擎長開 , 好唔環保 , 唔好以為逢日本人都係好人)

呢樣都算 , 再行多幾行 , 行到冇路行 , 除非夾硬穿草叢 .

咁就 "積丹岬" 架拿 ? 乜都冇既 , 係咪都整番塊牌俾人影相丫 ?

話晒都叫做旅遊風景區嘛 .  =_= !!

呢篇講住咁多先 . 

Bye Bye !