2014北海道11天自駕遊D4-5ニセコ昆布温泉ホテル甘露の森篇

(因為記憶咭遺失左 , 所以暫時冇相睇 , 遲D會接續番)

Hello !

上回講到在 "有島紀念館" 門前影相 , 攪掂之後上車 .

本來仲有個叫做 1000米展望台既地方 , 不過唔知開左檔未 ?

加上剩餘時間唔係咁多 , 都係留番第日再玩過 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住落黎既景點 , 全部都係翻炒 , 即係曾經到過 , 

今次只係舊地重遊 . 首先係二世古道の駅 . 

仲有 : 今次網誌既相片 , 係用番2010年果次果D , 唔駛假手於人 . 

當年曾經在呢個道の駅飲過支酸奶 . (其實係乳酪)

所以唔飲咯 , 今次改食雪糕 , 雲呢拿味軟雪糕 , 盛惠260Yen .

食完雪糕再四圍參觀 , 唔知係咪禮拜日效應呢 ? 今日四圍都見到電單車飛車黨 , 

聯群結隊四圍飛 , 雖然叫佢做飛車黨 , 不過都只係一般速度 , 

並唔係澳門格蘭披治大賽果隻 .  ^_^ !!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

跟住過隔離ニセコ駅 , (好近架咋) 呢個車站相當之有特色 .

講開呢個駅 , 又有野講 , 不過就唔關個駅事 .

話說當日見到車頭佈滿昆蟲屍體 , 諗住搵條毛巾濕D水抹左佢 , 

點知搵極都搵唔到條毛巾 , 思前想後之下 , 原來掛左在早幾日酒店浴室度 , 

Check Out 時冇拎番 , 唉 ~ 真失敗 , 雖然毛巾唔值幾多錢 , 

不過我最唔鍾意唔見野 , 估唔到過幾日連記憶咭都唔見埋 , 慘 ~ 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

再跟住去下一個景點 , 就係ニセコ大湯沼 .

呢個大湯沼 , 又係有古講 , 當日去到佢入口 , 居然有圍欄擋路 , 

上面寫住 : 關係以外者 , 禁止立入之類 , 以我所知 , 係得呢個入口 ,

點解咁做呢 ? 唔通大裝修 ? 條路旁邊係一間冇開檔既旅館 , 

既然冇開檔 , 做乜擋路呢 ? 生人霸死地喎 ~

於是有理冇理 , 擺低部車在外面 , 就咁行入去睇下乜野環境 ,

經過一段路之後 , 冇野喎 ~ 個沼好靚呀 , 仲好景過我上次黎果陣 .

好彩有硬闖唶 , 否則就miss左呢個景點咯 .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

攪掂埋大湯沼 , 都差唔多夠鐘往酒店 Check in .

不過呢個景點係必經之路 , 係咁咦影幾張相 , 唔會好阻時間唶 .  ^^

呢度就係甘露の森下路入口既甘露水 , 都有D人裝水架 .

最後係上去甘露の森 Check in 喇 .

之後就係食晚餐 ~ 浸溫泉呢類必修節目 , 

一別數年 , 呢度都冇乜點變 , 晚餐&溫泉依然咁正 , 尤其係晚餐果個甜品 , 

好難響第二度食得到 , 唯一有投訴既就係份量太小 , 大兜小小都唔怕死啦 .

第四日完 ~

Bye Bye !