2014北海道11天自駕遊D4-1大沼觀光船篇

(因為記憶咭遺失左 , 所以暫時冇相睇 , 遲D會接續番)

Hello !

上回講到到達 "大沼" 地帶 , 可惜天陰陰加上毛毛雨 , 

大大影響遊沼心情 , 況且尾班觀光船已開 , 所以翌日再黎玩過 ...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

返回酒店食杯麵及浸溫泉之後休息 , 醒來時已經進入行程第四日 .

梳洗過後落樓下食早餐 , 老老實實 ~ 冇左D相 , 呢度既早餐係點 ? 都唔記得晒咯 , 

不過印象中冇乜 Hard feeling , 應該唔會太差既 . (係個溫泉差D唶)

Check Out 之後即刻去番 "大沼" 果邊 , 今次泊在俾錢停車場 , 比較近嘛 .

停車場費400Yen , 呢個收費比較公道 .

經過詳細考慮 , 都係坐觀光船比較正路 , 艇仔 & 鴨仔船呢D體力勞動 , 

都係可免則免 . XD

去到受付 , 拎埋尋日觀光中心俾果張優惠券黎買飛 , 1000Yen就攪掂 .

果日雖然係星期日 , 可能早啦 , 觀光船居然得兩個乘客 . (油錢都可能蝕埋)

好耐之前 , (Yahoo時期) 有位叫 DM 既 Blog友經常向我推介 , 

話 "大沼" 呢度好正 , 今次一遊 , 果然名不虛傳 , 正 ~ 

一直以黎我都覺得呢個沼唔係好大地方 , 唔遊覽過都唔知 , 

感覺上絕對不下於 "洞爺湖" , 或者 "支笏湖" .

隻船行左一陣 , 就見到呢個 駒ヶ岳 , 呢個岳個外型 , 

似足隻燒豬擺上檯之勢 , 唔知大家又點睇 ? 

(相片在網上搜尋 , 江湖救急 , 唔該晒 , 雖然唔知邊位)

臨開船之前 , 有位工作人員上船影相 , 上岸時放在旁邊讓遊人選購 , 

呢D咁既情況 , 只要唔係影得太樣衰 , 都會順手買埋佢 , 

做遊客 , 係要俾人劏架喇 .  ^_^ !!  (盛惠980Yen)

另外果位乘客在前排 , 我就在相中 , 不過執走左 . 

坐完觀光船上岸 , 沿住沼邊行一陣 , 再上一間叫做 大沼展望閣 既地方 , 

果度 地下係商店 , 2 & 3樓係食堂 , 天台係展望台 , 無料架 .

雖然唔算好高 , 不過都睇到好多野 , 唔錯 .

今晚講住咁多先 , 聽晚星期六休息 , 星期日再黎過啦 .

Bye Bye !