Hello !
今日係一月一日 , 首先祝大家新年進步 , 身體健康 ,
發多D新年財 , haha ... 農曆年咩 . XD
呢兩晚市區只得8度左右 , 正式係凍到啊媽都唔認得 , 日頭還好 , 好似依家咁烈陽普照 ,
一D寒氣都冇 , 就連外套都唔駛著 , 一件T恤都頂得順 , 係乾燥左D啫 .
講開又講 , 夜晚果陣既凍 , 令我諗起去北海道時 , 在機場等轉機果陣 ,
厚衫大褸放在寄艙行李未拎出黎 , 襯果陣會行出機場室外地方 ,
感受一下寒氣 , 直到頂唔順先至返回室內 , 日本市區氣溫大約零度 ,
陣陣寒風直刺入骨內 , 真係好爽架 , 依家既氣溫可以感受番當日既情懷 ,
而真正去日本一事 , 不知何年何月先至可以咯 , 唉 ...
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
好 ~ 廢話講完入番正題 , 呢篇叫做強制性大廈檢測 , 簡單D講 ,
即係14日裡面 , 有兩個人中左招 , 該棟大廈所有住客及訪客都要強制性檢測 ,
好唔好彩 , 我住果座大廈剛剛入圍檢測門檻 , 所以就要接受強檢 ,
正式係六合彩就唔見中 , 衰野就中到正一正 . >_< !!
所謂兵貴神速 , 尋晚番屋企知道消息後 , 食完個晚飯 (買左外賣唔想攤凍)
襯佢未收工 , 落去做埋個檢測 .
去到檢測中心 , 同上次全民檢測一樣 , 係都係用棉花棒撩兩邊鼻及喉嚨 ,
過程完全唔痛唔盛 , 仲有D舒服添 , haha ... 而且安排相當之妥當 ,
登記好身份証之後 , 排一兩個人就到 , 全程只係用左幾分鐘就OK ,
睇新聞見到其他人做強檢 , 個個怨聲載道 , 甚至話同跳舞群組一齊排隊 ,
真係唔得佢死呀 . XD
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
順便講埋 , 今次檢測費用全免之餘 , 仲有一整盒口罩送 ,
上次只係送10個 , 今次送足一盒 , 認真大手筆 , 多謝晒喎 .
雖然我屋企大把口罩 , 不過叫做小小意思 , 唔成敬意 , 請笑納 !
就係呢一盒 , 50個裝 , NOT FOR SALE
一袋裝晒 , 冇獨立包裝 , 冇乜所謂啦 , 送既野 , 要求唔好咁高 .
最後 , 希望得出黎既結果係陰性 , 否則就真係大檸樂咯 .
不過我對自己好有把握既 , 有消息再通知大家 .
Bye Bye !
新年進步!最緊要身體健康!
回覆刪除上次全民檢測我都有做,冇唔舒適,係有d痕。
今次我攞咗樽仔,不過仲未做。其實我想做撩鼻多d🤪
新年快樂 , 身體健康 , 搵多D同樣重要 . ^^
刪除我最唔鍾意樽仔 , 撩鼻感覺好好多 , 起碼有人幫我攪 , 唔駛自己黎 .
[用棉花棒撩兩邊鼻及喉嚨 , 過程完全唔痛唔盛 , 仲有D舒服添]
回覆刪除上次我都有呢個感覺。
新年快樂
我以為淨係得我會有呢種感覺添 . haha ...
刪除睇黎政府真係高手如雲喎 .
等你報告﹗上次全民檢測我都有做,係有啲吾舒服,可能幫我做檢測的婆婆,真係婆婆目測有七十多歲,在撩鼻及喉嚨轉得慢我才有點吾舒服,祝你新年快樂﹗
回覆刪除報告出左 , 一陣整番篇 .
刪除睇新聞片D醫護人員 , 將支棒隊到好深 , 我見到都幫佢驚埋一份 . XD
新年快樂 , 身體健康 , 大家咁話啦 . Yeah !!
我就相反,撩鼻攪到我流鼻水及眼水,撩喉嚨就令我反胃,無必要都唔想再做第二次
回覆刪除正常應該係唔舒服既 , 可能係幫我撩果個手下留情 . XD
刪除話時話 , 我都唔想再做第三次 .